Sanguem News सांगे तालुक्यातील सुळकर्णे गावात डोंगराळ भागातून एकाएकी मोठ्या प्रमाणात पाण्‍यासह चिखल, माती वाहून येऊ लागल्‍याने नागरिकांत भीतीचे वातावरण पसरले आहे.

27 जुलैपासून सुळकर्णे गावाला लागून असलेल्या डोंगराच्या खालच्या बाजूने चिखलमिश्रित पाणी नागरीवस्‍तीकडे येऊ लागले. यासंदर्भात माहिती मिळताच केपेचे मामलेदार, पोलिस निरीक्षक, अग्निशमन दलाच्‍या अधिकाऱ्यांनी घटनास्थळी जाऊन पाहणी केली.

खनिज खंदकात भरलेले पाणी येत आहे का, याचीही पडताळणी करण्‍यात आली, पण तेथून पाणी येत नसल्याचे सिद्ध झाले. त्‍यानंतर डोंगराच्या पायथ्याशी असलेल्या एका जागेतून पाणी येत असल्याचे दिसून आले.

स्‍थानिक आमदार तथा मंत्री सुभाष फळदेसाई यांनी रात्री अग्निशमन दलाचे जांबावलीकर तसेच केपे पोलिसांना बरोबर घेऊन सुळकर्णे गावाला भेट देऊन पाहणी केली. मोठ्या प्रमाणात पाणी गावात येत असल्याने त्यांनी या ठिकाणी पोलिस व आपत्ती व्यवस्थापनाला तैनात करण्यात यावे, अशी सूचना दिली.

पाण्‍याचा दाब वाढल्‍याचा परिणाम

केपेचे मामलेदार प्रताप गावकर तसेच खाण खात्याचे अधिकारी व भूगर्भतज्‍ज्ञ यांनी शुक्रवारी सकाळी गावाला भेट देऊन पाहणी केली असता या दिवसांत मोठ्या प्रमाणात पाऊस पडल्याने पाण्याचा दाब वाढल्याने माती, चिखलमिश्रित पाणी येत असल्याचे त्यांनी सांगितले.