Goa News: साळ नदीतील गाळ उपसण्यासाठी सुमारे २०० कोटीपेक्षा जास्त खर्च केला आहे. तरीही तेथे सुधारणा झालेली नाही. त्याविरोधात आम्ही निदर्शनेही केली. मात्र, त्याची दखल घेतली गेलेली नाही. कामत यांना केवळ गाळ उपसण्यासाठी कंत्राटदार नेमण्यात रस आहे, अशी टीका कुतिन्हो यांनी प्रसिद्धी पत्रकाद्वारे केली आहे.

गेल्या कित्येक वर्षांपासून शॅडो कौन्सिल साळ नदीच्या प्रदूषणासंदर्भात प्रश्र्न उपस्थित करत आहे. कित्येक वर्षांपासून मडगाव शहर व आजुबाजुच्या गावांतील सांडपाणी या नदीत सोडले जाते.बाणावलीचे आमदार वेंझी व्हिएगस यांनी दिगंबर कामत आणि गाळ उपसणारा कंत्राटदार यांच्यामध्ये नेमके काय संबंध आहेत, याचा शोध घ्यावा, असे आवाहन कुतिन्हो यांनी केले आहे.

साळ नदीत सांडपाणी सोडले जाते. ते बंद करण्यासाठी कायमस्वरूपी उपाययोजना करण्यात मडगावच्या आमदारांना मुळीच रस नाही. जुलैमध्ये कामत आणि व्हिएगस यांनी साळ नदीची पाहणी केली होती. मात्र, आपल्या तीन दशकांच्या कारकिर्दीत आमदार कामत यांनी कधीही साळ नदी प्रदूषित झाल्याचा उल्लेख केलेला नाही.