Sacorda Gramsabha म्हादई, नेत्रावळी अभयारण्ये व पश्चिम घाटात लोक पूर्वीपासून वास्तव्य करत आहेत. व्याघ्र संरक्षित क्षेत्रामुळे त्यांच्या जीवनाला धोका निर्माण होऊ शकतो. त्यांच्यावर दुष्परिणाम होण्याची दाट शक्यता असल्याने साकोर्डा ग्रामसभेत व्याघ्र प्रकल्प अधिसूचनेला प्रखर विरोध करून ठराव संमत करण्यात आला.

व्याघ्र प्रकल्प अधिसूचनेचा ठराव माजी सरपंच माधवराव देसाई यांनी सभेत मांडला व उपस्थित ग्रामस्थांनी ठरावाला एकमताने समर्थन दिले. साकोर्डा पंचायत क्षेत्रात सुमारे २ हजार घरे आहेत. या घरांचे प्रत्येक ५ वर्षांनी नियमानुसार फेर सर्वेक्षण करण्यात येते.

गतवर्षी या घरांचे फेर सर्वेक्षण करून सुधारित कर लागू करण्यात येणार आहे. येत्या ६ महिन्यांत सर्व घरांचे फेर सर्वेक्षण करून ग्रामसभेत फेर सर्वेक्षणावर चर्चा करून सभेची मान्यता घेण्यात येईल. त्यानंतर सुधारित कर लागू करण्यात येणार आहे, अशी माहिती उपसरपंच शिरीष देसाई यांनी सभेत दिली.

ग्रामीण सौरऊर्जा योजनेअंतर्गत चंद्रावती नाईक, सुलोचना मावळींगकर यांच्या अर्जांना मान्यता देण्यात आली. सरपंच प्रिया खांडेपारकर, उपसरपंच शिरीष देसाई, पंच संजना नार्वेकर, महादेव शेटकर, जितेंद्र कालेकर, गायत्री मापारी, सोनू गावकर व निरीक्षक ट्विंकल मायणेकर सभेला उपस्थित होत्या. प्रिया खांडेपारकर यांनी स्वागत केले. शिरीष देसाई यांनी आभार मानले.

35 वर्षांपासून गढूळ पाणी

साकोर्डातील नळाला गेल्या 30-35 वर्षांपासून गढूळ पाणी येत आहे. त्यामुळे ग्राहकांत संतापाची लाट उसळली आहे. अनेक वर्षांची जलवाहिनी असल्याने ती बदलावी, अशी मागणी प्रदीप वेरेकर यांनी केली. या समस्यांचे निवारण करण्यासाठी अनेक वेळा संबंधित अधिकाऱ्यांना स्मरणपत्र पाठवले आहे. त्याचा पाठपुरावा सुरू असल्याचे देसाई यांनी सांगितले.