Goa news: मुद्रण आणि छपाई मंत्री रोहन खंवटे यांनी सल्लागार म्हणून नियुक्त केलेले गोवा प्रिंटिंग प्रेसचे निवृत्त संचालक एन. डी. अग्रवाल यांच्‍याविषयी काही आक्षेपार्ह मुद्दे आहेत, त्‍यांचा सरकारने विचार करावा, अशी मागणी ‘आरटीआय’ कार्यकर्ते आयरिश रॉड्रिग्‍ज (Aires Rodrigues) यांनी केली आहे.

याबाबत जारी केलेल्‍या पत्रकात आयरिश यांनी म्‍हटले आहे की, अग्रवाल यांनी निवृत्तीच्या आधी 2013 मध्ये नारायणी पब्लिकेशनची स्थापना केली आणि गोवा सरकारची सर्व प्रकाशने छापली आणि Goakaido.com या वेबसाइटद्वारे प्रीमियमवर विक्री केली.

सरकारी मुद्रणालयात कोणतेही प्रकाशन उपलब्ध नसल्यास ते एन. डी. अग्रवाल यांच्या वेबसाइटवरून मागवले जाऊ शकते. गोवा Kaido.com आणि नारायणी पब्लिकेशन या दोन्हीचा पत्ता एकच आहे आणि तिथेच एन. डी. अग्रवाल राहतात. त्यांचा बंगला बांधण्यासाठी त्यांनी ती कोमुनिदादकडून जमीन कशी मिळवली ? त्यांनी मिळवलेली प्रचंड संपत्तीचीही चौकशी व्‍हायला हवी.

रॉड्रिग्‍ज यांनी म्‍हटले आहे की, प्रिंटिंग प्रेसमध्ये असताना त्यांनी सर्व फाईल्स कॉपी केल्या होत्या आणि ती प्रकाशने प्रकाशित करण्यासाठी ते वापरत आहेत का, याचा शोध घ्‍यावा. सरकारी मुद्रणालयाचा सल्लागार असूनही, ते त्या छापखान्याच्या प्रकाशनांच्या प्रती विकत आहेत आणि तेही राज्याला कोणतीही रॉयल्टी न देता, असाही आरोप आयरिश यांनी केला आहे.