Goa RSS: विजयादशमीनिमित्त राष्ट्रीय स्वयंसेवक संघातर्फे आयोजित करण्यात आलेले ''दसरा संचलन'' उत्साहात पार पडले. यंदा साखळी येथे या संचलनाचे आयोजन करण्यात आले होते. या संचलन मिरवणुकीला चांगला प्रतिसाद मिळाला. राज्याचे मुख्यमंत्री डॉ. प्रमोद सावंत हेही या संचलनात उत्साहात सहभागी झाले होते.

साखळी येथील रवींद्र भवनाकडे संघाच्या ध्वजाला प्रणाम आणि प्रार्थना म्हटल्यानंतर या संचलनाला सुरुवात झाली. रवींद्र भवनाकडून गोकुळवाडामार्गे पुलाकडून बाजारातून श्री राधाकृष्ण मंदिराजवळ येताच संचलनाचा समारोप झाला. राष्ट्रीय स्वयंसेवक संघाच्या स्थापनेनिमित्त दरवर्षी विजयादशमीला डिचोलीत संचलन काढण्यात येते. यंदा प्रथमच साखळीत संचलन झाले.

विजयादशमीच्या शुभेच्छा: राज्याचे मुख्यमंत्री डॉ.प्रमोद सावंत हे संघाचे स्वयंसेवक. खाकी पॅन्ट, सफेद शर्ट आणि डोक्यावर टोपी असा संघाचा वेश परिधान आणि दंडुका घेऊन मुख्यमंत्री डॉ. प्रमोद सावंत हे या संचलन मिरवणुकीत सहभागी झाले होते.

अन्य स्वयंसेवकांबरोबर त्यांनीही जवळपास पाऊणतास पायपीट केली. मुख्यमंत्री डॉ. सावंत यांनी संचलनाचे महत्त्व विषद करून सर्वांना विजयादशमीच्या शुभेच्छा दिल्या.