Goa Rajyasabha Election 2023 : भाजप प्रदेशाध्यक्ष सदानंद शेट तानावडे यांची राज्यसभेवर बिनविरोध निवड झाल्याचे सोमवारी अधिकृतरीत्या जाहीर करण्यात आले. या निवडणुकीसाठी तानावडे यांनी ११ जुलै रोजी अर्ज दाखल केला होता. त्यादिवशीच विरोधी पक्षांनी गोव्यातून राज्यसभेसाठी उमेदवार उभा करणार नसल्याचे जाहीर केले होते. त्यामुळे तानावडे यांची निवड निश्चित होती.

सोमवारी अर्ज मागे घेण्याच्या वेळेपर्यंत तानावडे यांचा एकमेव अर्ज शिल्लक राहिल्याने या संबंधित सर्व तपशील केंद्रीय निवडणूक आयोगाकडे पाठवण्यात आला.

त्यानंतर त्यांची बिनविरोध निवड झाल्याचे जाहीर करण्यात आले. या खासदारकीचे प्रमाणपत्र उद्या मंगळवारी सकाळी साडेदहा वाजता विधानसभा मुख्य सचिव नम्रता उलमन यांच्या कार्यालयात प्रदान करण्यात येईल.

सत्काराची तयारी

तानावडे यांना विधानसभेत राज्यसभा निवडणूक अधिकारी तथा विधानसभा सचिव नम्रता उलमन यांच्या कार्यालयात खासदार प्रमाणपत्र देण्यात येईल. यावेळी मुख्यमंत्र्यांसह मंत्री, आमदार उपस्थित राहणार आहेत.

तिथे त्यांचा छोटीखानी सत्कार करण्यात येणार आहे आणि संध्याकाळी सहा वाजता ताळगाव येथील कम्युनिटी सेंटरमध्ये भव्य कार्यकर्त्यांच्या उपस्थितीत सत्कार आयोजित केला आहे.