पणजी: राज्यात १ जून ते ३१ जुलैपर्यंत १९८२.३ मि.मी. म्हणजेच ७८.०४ इंच इतक्या पावसाची नोंद करण्यात आली आहे. जुलै महिन्यात ११८९ मि.मी. म्हणजेच ४६.८ इंच इतक्या पावसाची नोंद करण्यात आली. जुलैमध्य पडणाऱ्या सर्वसामान्य पावसाच्या तुलनेत १३.६ टक्के अधिक आहे.

धारबांदोडा, सांगे आणि वाळपई केंद्रावर पावसाने इंचाचे शतक पार केले आहे. त्यासोबतच राज्यातील सर्व केंद्रांवर आत्ता किमान ५० इंचाहून अधिक पावसाची नोंद करण्यात आली आहे. राज्यात पुढील चार दिवस तुरळक पाऊस पडण्याची शक्यता गोवा वेधशाळेने वर्तविली आहे.

जून महिन्यात राज्यात पावसाचा तुटवडा नोंदविण्यात आला होता, परंतु आता सरासरी ७८.०४ इंच पाऊस राज्यात झालेला आहे. जुलैमध्ये कधी जोरदार तर कधी मध्यम व काही दिवस कडकडीत उन्हाचे गेले. पाऊस हा प्रामुख्याने १ जुलै ते ७ जुलै आणि १५ जुलै ते २६ जुलै या कालावधीत बरसला. यंदा जुलैमध्ये एका दिवसात सर्वाधिक ६.३ इंच पावसाची नोंद ३ जुलै रोजी झाली.

शंभर इंच पाऊस!

तसे पाहता यंदा राज्यात २५ मे रोजी मॉन्सूनचे आगमन झाले. त्यामुळे मे, जून आणि जुलैमधील पाऊस धरला तर एकूण १०० इंच पाऊस पडला आहे. त्यामुळे राज्यात पावसाने शंभर इंचाचा टप्पा गाठला असे म्हटल्यास वावगे ठरणार नाही.

पाच वर्षांतील जुलैमधील पाऊस

वर्ष मि.मी. इंचात

२०२१ १२८१ ५०.४३

२०२२ ११८७ ४६.७३

२०२३ १८३१ ७२.०८

२०२४ २०१३ ७९.२५

२०२५ ११८९ ४६.८१