ज्याप्रमाणे घराघरांत नळ व वीज जोडणी दिली जाते, त्याप्रमाणे ज्या लोकांना इंटरनेट सुविधा पाहिजे, त्यांना 2024 पर्यंत ‘हर घर फायबर’ या योजनेतून ती पुरवली जाईल, अशी ग्वाही पर्यटनमंत्री रोहन खंवटे यांनी दिली. ‘मंत्री तुमच्या दारी’ कार्यक्रमांतर्गत केपे तालुक्याच्या भेटीवर आले असता त्यांनी स्थानिकांशी संवाद साधला.

यावेळी त्यांच्यासोबत सार्वजनिक बांधकाम मंत्री नीलेश काब्राल, समाजकल्याण मंत्री सुभाष फळदेसाई, केपेचे आमदार एल्टन डिकॉस्ता, माजी आमदार बाबू कवळेकर आणि मान्यवर उपस्थित होते. इंटरनेट सुविधा राज्यातील सर्वांपर्यंत पोहचविण्यासाठी आमचे सरकार काम करत आहे. मात्र, सध्या लोकांना इंटरनेट सुविधा पाहिजे; पण टॉवर नको, अशी स्थिती निर्माण झाली आहे, अशी खंतही खंवटे यांनी व्यक्त केली.

इको पर्यटनावर भर

गोवा राज्य पर्यटनस्थळ म्हणून जगभर प्रसिद्ध आहे. पण ही ओळख फक्त समुद्र किनाऱ्यांपुरती मर्यादित न ठेवता गोव्यातील कानाकोपऱ्यात जाऊन इको पर्यटनावर भर दिला पाहिजे. गोवा हे 365 दिवसांसाठी पर्यटनस्थळ म्हणून ओळखले जावे, यासाठी आता पावसाळ्यातही पर्यटक राज्यात येण्यासाठी सोयीसुविधा निर्माण करणार असल्याचे खंवटे यांनी सांगितले.

मंदिरांचे सुशोभीकरण

केपे तालुक्यात पर्यटनाला मोठा वाव आहे. केपे तालुक्यात बेतुल येथील किल्ला, कुंकळ्ळी येथील शांतादुर्गा फातर्पेकरीण आणि शांतादुर्गा कुंकळ्ळीकरीण मंदिर, बार्शे, मोरपिर्ला येथील मंदिरांचे सुशोभीकरण, कुडचडे येथील नंदा तळे आणि काकोडा येथील महादेव देवस्थानचे सुशोभीकरण करणार असल्याची माहिती खंवटे यांनी दिली.