Porvorim Crime पर्वरी येथे जो मारामारीचा व्हिडिओ व्हायरल झाला आहे, त्यात दिसणारा युवक माझा मुलगा शेनोन नव्हे, असा खुलासा आज माजी मंत्री आणि नावेलीचे माजी आमदार आवेर्तान फुर्तादो यांनी केला.

आज नावेली येथे घेतलेल्या पत्रकार परिषदेत फुर्तादो यांनी हा खुलासा केला. या व्हिडिओमुळे आपले आणि आपल्या मुलाचे नाव विनाकारण बदनाम झाले आहे.

आपण सायबर क्राईम विभागाकडे या बाबत आज तक्रार दिली आहे. हा व्हिडिओ समाज माध्यमावर कुणी अपलोड केला, याची चौकशी करून त्याच्यावर कारवाई करण्याची मागणी केली आहे, असे त्यांनी सांगितले.

आज घेतलेल्या पत्रकार परिषदेत त्यांच्या बरोबर त्यांचे पुत्र शेनोन उपस्थित होता. काल समाज माध्यमावर एक मारामारीचा व्हिडिओ व्हायरल झाला होता. हा मारामारी करणारा फुर्तादो यांचा पुत्र असल्याचे त्यात नमूद केले होते.

या व्हिडिओमुळे आपल्याला विनाकारण मनस्ताप सोसावा लागला. हा व्हिडिओ अपलोड करण्यापूर्वी निदान आपल्याकडे विचारून खात्री तरी करून घ्यायची गरज होती असे ते म्हणाले.