मडगाव : राष्ट्रवादी आणि गोवा फॉरवर्ड (Goa Forward) या पक्षा बरोबर युतीची बोलणी चालू आहेत असे गोवा प्रभारी दिनेश गुंडू राव यांनी जरी सांगितले असले तरी अशी युती (Goa Politics) नकोच या भूमिकेवर माजी मंत्री मिकी पाशेको (Mickey Pashko) ठाम आहेत. या युतीमुळे काँग्रेसचा (Congress) फायदा होण्याऐवजी नुकसानच अधिक होईल असे त्यांनी सांगितले.

आज पणजी येथे पाशेको यांनी आपली ही भूमिका पुन्हा एकदा मांडली. ते म्हणाले, आज हे समविचारी पक्ष आपल्याला जास्तीत जास्त जागां मिळाव्यात यासाठी रोज नवनवीन तारखा जाहीर करून काँग्रेस पक्षाला ब्लॅकमेल करू पाहत आहेत. जर यांच्याशी युती करून सरकार सत्तेवर आले तर उद्या हेच आपल्याला चांगली खाती मिळावीत यासाठी ब्लॅकमेल करतील असे ते म्हणाले.

'गोमंतक'शी बोलताना पाशेको म्हणाले, 'गांधी घराण्यालाही या पक्षाशी युती नकोच आहे. गद्दार व घातकी यांची संगत नको हे राहुल गांधी यांनी यापूर्वीच जाहीर केलेले आहेत. ज्या आमदारांनी काँग्रेसचा त्याग करून भाजपशी घरोबा केला ते गद्दार आहेतच त्याशिवाय भाजपला सत्ता स्थापन करण्यासाठी मदत करणारे गोवा फॉरवर्ड आणि राष्ट्रवादी हे घातकी आहेत.

फक्त सरकारातून काढून टाकले म्हणून गोवा फॉरवर्ड भाजपला विरोध करत आहे. चर्चिलचा तर कालपरवापर्यंत मुख्यमंत्री प्रमोद सावंत यांच्या बरोबर हनिमून चालू होता.'

पाशेको म्हणाले, मी माझी भूमिका स्पष्टपणे चिदंबरम आणि गुंडू राव यांच्यासमोर मांडली आहे. काँग्रेसला युतीची गरज नाही. गरज आहे ती राष्ट्रवादी आणि गोवा फॉरवर्डसाठी. या दोन पक्षांचे पुनर्वसन करण्यासाठी काँग्रेसने स्वतःचा बळी देऊ नये अशी माझी इच्छा आहे असे पाशेको म्हणाले. काँग्रेसमध्ये फक्त काही नेत्यानाच ही युती हवी बहुसंख्याना नको अशी एकूण परिस्थिती आहे असे ते म्हणाले.