कुडचडे : नावेली मतदारसंघाच्‍या आमदाराने मंत्रीपद आणि मुख्यमंत्रीपद उपभोगले (Goa Politics). तरीसुद्धा हा मतदारसंघ अजूनही मागासलेला आहे. या आमदारांनी (MLA) फक्त स्वतःचा विकास साधला. दुसरीकडे भाजप (BJP) सरकार गोव्यातील (Goa) तरुणांच्या भवितव्याशी खेळत आहे. नोकऱ्या देण्यात पक्षपात करणे हा बेरोजगार युवकांवर अन्याय आहे, असे प्रतिपादन आम आदमी पक्षाच्‍या उपाध्‍यक्षा प्रतिमा कुतिन्‍हो यांनी केले.

‘आप’च्‍या (AAP) परिवर्तन यात्रेत कुतिन्‍हो बोलत होत्‍या. त्‍यांनी तसेच कुडचडेचे प्रभारी नेते गाब्रिएल फर्नांडिस, ‘आप’चे सहसचिव जेम्स फर्नांडिस, कुंकळ्‍ळी विधानसभा प्रभारी प्रशांत नाईक, उपाध्यक्ष कॅप्टन व्हेंझी व्हिएगस आणि नामदेव माशेलकर यांनी अनुक्रमे नावेली, कुडचडे, कुंकळ्‍ळी, बाणावली, सांत आंद्रेत परिवर्तन यात्रा काढली.

कुडचडेचे आमदार नीलेश काब्राल यांनी मतदारसंघावर सत्ता गाजवून दहा वर्षे झाली आहेत. परंतु येथील लोकांना आमदाराकडून ज्या अपेक्षा होत्या, त्या पूर्ण झाल्या नाहीत. आता लोकांना बदल हवा आहे, असे फर्नांडिस म्हणाले.

कुंकळ्‍ळीत भाजप आणि काँग्रेस (Congress) हे दोन्ही निवडून आले, परंतु फारशी प्रगती झाली नाही. चांदोर आणि गिर्दोलीत प्राथमिक आरोग्य सुविधा नाहीत. ‘आप’ सत्तेवर आल्यास आपण ५० खाटांचे आरोग्यकेंद्र उभारेन, असे आश्‍‍वासन प्रशांत नाईक यांनी दिले. व्हेंझी व्हिएगस यांनीही विचार मांडले.

सांतआंद्रे मतदारसंघ विकासापासून वंचित

सांतआंद्रेच्‍या विद्यमान आमदाराने गेल्या निवडणुकीवेळी काँग्रेसमधून भाजपमध्‍ये प्रवेश केला आणि जनतेचा विश्वासघात केला. सत्ताधारी पक्षात असूनही ते कोणताही विकास साधू शकलेले नाहीत. मतदारसंघात बेरोजगारी वाढत असून आमदाराला काहीच पडलेले नाही. कोरोना महामारीच्या काळातही लोकांना म्‍हणावे तसे सहकार्य मिळाले नाही. गोमंतकीय जनता ‘आप’चे नेते अरविंद केजरीवाल यांनी जाहीर केलेल्‍या घोषणांचे कौतुक करत आहे, असे सांतआंद्रेतील ‘आप’चे नेते नामदेव माशेलकर म्हणाले.