Goa Police Recruitment : गोवा पोलीस भरती प्रक्रिया 8 दिवसात सुरु करणार असल्याची घोषणा मुख्यमंत्री डॉ. प्रमोद सावंत यांनी केली आहे. गोवा पोलीस महासंचालक आणि वरिष्ठ अधिकाऱ्यांसोबत आढावा बैठक घेतल्यानंतर मुख्यमंत्र्यांनी माध्यमांशी संवाद साधला. यावेळी आधी विधानसभा आणि त्यानंतर पंचायत निवडणुकीच्या आचारसंहितेमुळे प्रक्रिया रखडल्याचं स्पष्टीकरण मुख्यमंत्री प्रमोद सावंतांनी दिलं.

गोव्यात सध्या वाढत्या गुन्हेगारीमुळे सरकार आणि गोवा पोलिसांच्या कार्यक्षमतेवर विरोधकांकडून प्रश्नचिन्ह उपस्थित केलं जात आहे. मात्र कोव्हिड नंतरच्या काळात ही गुन्हेगारी वाढली असून यात राज्याबाहेरील लोकांचा सहभाग असल्याचा दावा मुख्यमंत्री प्रमोद सावंतांनी केला आहे. तसंच गोव्यात गुन्ह्यांच्या तपासाचा दरही देशात सर्वाधिक असल्याचं मुख्यमंत्री म्हणाले. पोलिसांच्या कामामध्ये आपण गृहमंत्री म्हणून कोणताही हस्तक्षेप करत नाही. त्यामुळे अन्य राजकारण्यांचा हस्तक्षेप असण्याचं कारण नाही, असंही मुख्यमंत्री म्हणाले.

दरम्यान हैदराबाद पोलिसांकडून गोवा पोलिसांवर विनाकारण आरोप होत असल्याचा दावाही मुख्यमंत्र्यांनी केला आहे. पोलीस महासंचालक जसपाल सिंग यांनी केलेल्या मेलला अजूनही उत्तर न दिल्याचं स्पष्टीकरण मुख्यमंत्र्यांनी दिलं आहे.

गोव्यात गुन्हेगारीला आळा घालण्यासाठी पोलीस प्रशासन तत्पर असून गेल्या काही दिवसांमध्ये पोलिसांनी अनेक गुन्हेगारांच्या मुसक्या आवळल्या आहेत. याच कारवाईचा एक भाग म्हणून अमली पदार्थ विरोधी पथकाने तीन ड्रग तस्करांना तुरुंगात टाकलं आहे. यापुढेही अशाच प्रकारची धडक कारवाई पोलिस पथकाकडून सुरु राहील असं मुख्यमंत्री म्हणाले.

तसंच राज्यात आयोजित केल्या जाणाऱ्या ड्रग्ज पार्टी किंवा ज्या पार्टीमध्ये ड्रग्जचं सेवन होत असेल अशांवर कडक कारवाई केली जाणार आहे. तसंच पोलीस कारवाईच्या माध्यमातून आम्ही ड्रग्जची गरजच गोव्यातून संपवण्यासाठी प्रयत्नशील असल्याचं मुख्यमंत्री म्हणाले आहेत.

दुसरीकडे महिलांवरील अत्याचारावरही मुख्यमंत्र्यांनी स्पष्टीकरण दिलं. माहितीतल्या माणसाकडूनच लैंगिक अत्याचार होत असल्याचं वक्तव्य मुख्यमंत्र्यांनी केलं आहे. ओळखीचा फायदा घेत महिलांवर अत्याचार केले जातात, ज्यात प्रामुख्याने अल्पवयीन मुलीही बळी पडताना दिसत आहे. मात्र आता हे लैंगिक अत्याचार रोखण्यासाठी महिला पोलिसांच्या माध्यमातून जनजागृती करणार असल्याचंही मुख्यमंत्र्यांनी स्पष्ट केलं. यासोबतच विविध संस्थांच्या मदतीतून विद्यार्थ्यांना लैंगिक शिक्षण देऊन त्यांचं प्रबोधन करण्यासाठी प्रयत्न करणार असल्याचंही त्यांनी सांगितलं आहे.

गोव्यात अपघाती मृत्यूंचं प्रमाण हे फार मोठं आहे. याला वाहतुकीचे नियम न पाळणं हेच महत्त्वाचं कारण आहेत. ड्रंक अँड ड्राईव्ह आणि वाहतुकीचे नियम न पाळल्यामुळेच अपघात होऊन त्यात अनेकांना आपला जीव गमावावा लागल्याचं मुख्यमंत्र्यांनी सांगितलं.