पेडणे पोलिसांनी चोरीच्या एका प्रकरणात पंजाबमधून एकाच्या मुसक्या आवळल्या. 23.4 लाखांचे सोने आणि रोकड घेवून राजू सोनार नावाचा व्यक्ती फरार झाला होता. रुत्विक विलास पांडुरकर (वय, वर्ष 22) याने राजूच्या विरोधात पेडणे पोलिस ठाण्यात तक्रार दाखल केली होती. त्यानंतर या चोरीच्या प्रकरणी पोलिसांनी राजूचा शोध सुरु केला होता.

रुत्विकने पोलिसांत दिलेल्या तक्रारीत म्हटले होते की, सप्टेंबर ते नोव्हेंबरदरम्यान राजूला नवीन दागिने तयार करुन देण्यासाठी 18.2 लाख रुपये किमतीचे जुने सोने आणि 5.2 लाखांची रोकड दिली होती.

दरम्यान, रुत्विकने नोंदवलेल्या तक्रारीनुसार पोलिस राजूचा शोध घेत धारगळ येथील त्याच्या निवासस्थानी पोहोचले होते. मात्र राजू घटनास्थळी पोलिसांना मिळाला नाही. त्यानंतर राजूच्या शोधात पेडणे पोलिसांनी पंजाब गाठले. पोलिसांना मिळालेल्या माहितीनुसार, राजू रुत्विकला गंडा घालून पंजाबला पोहोचला आहे. पंजाबमधील (Punjab) पुरोवाल जट्टन येथे तो पोलिसांच्या हाती लागला. पेडणे पोलिस बुधवारी (18 डिसेंबर) राजूला गोव्यात घेवून आले.