Japanese Tourist : काही दिवसांपूर्वी एका जापानी नागरिकाची गोव्यात फसवणुक झाल्याची घटना उघडकीस आली होती. फसवणुक झाल्याचा खुलासा हा जापानी नागरिकाने ट्विट करत केला होता. त्यानंतर जपानी नागरिकाने हणजूण पोलिसांत ई-मेलद्वारे तक्रार नोंदवली होती.

अखेर दोन महिन्यानंतर याप्रकरणी हणजूण पोलिसांनी गुन्हा नोंद केला होता. पोलिसांनी रॉनी, राजू व इतर दोन अज्ञात व्यक्ती अशा चार संशयितांविरोधात गुन्हा नोंद केला. दरम्यान, याप्रकरणी तिघा संशयितांना अटक करण्यात आली आहे.

एक जपानी पर्यटक गोव्यात पर्यटनासाठी 29 डिसेंबर रोजी आला होता. यावेळी जापानी नागरिकाला काही जणांनी आपण पोलिस असल्याचे भासवत वाडी शिवोली येथील फ्लॅटवर नेले. जापानी नागरिकाला त्यांनी दमदाटी व मारहाण करत त्याची 9.43 लाखांची लुबाडणूक केली. यानंतर त्याला धमकी देत गोव्याच्या बाहेर पाठवण्यात आले.

ही घटना डिसेंबरमध्ये घडली होती. जपानी पर्यटकाने ट्विटवर पोस्टमधून त्याची कैफियत मांडली. माझे पैसे परत मिळावेत यासाठी मला पाठिंबा द्या, अशी विनंती त्याने पोस्टमधून केली होती. या जपानी पर्यटकाने ज्या व्यक्तींनी त्याला लुटले त्या संशयितांचे फोटोही शेअर केले.

यानंतर उत्तर गोव्याचे पोलिस अधीक्षक निधीन वाल्सन यांनी संबंधित जपानी व्यक्तीला मेलद्वारे तक्रार करण्यास सांगितले तसेच संपर्क क्रमांकही मागितला तसेच याबाबत चौकशी करू, असे आश्वासनही त्यांनी पर्यटकाला दिले होते.

वाल्सन यांच्या ट्विटला उत्तर देताना जपानी नागरिकाने, दीड महिन्यांपासून पोलिसांना ई-मेल पाठवत असल्याचे म्हटले आहे. अनेकदा सांगुनही एफआयआर नोंदवली नाही, असेही त्याने म्हटले होते.

अखेर दोन महिन्यानंतर रविवारी याप्रकरणी हणजूण पोलिसांनी गुन्हा नोंद केला होता. पोलिसांनी रॉनी, राजू व इतर दोन अज्ञात व्यक्ती अशा चार संशयितांविरोधात गुन्हा नोंद केला. दरम्यान गुन्हा नोंद दाखल होताच दोन दिवसांत तिघा संशयितांना अटक करण्यात आली आहे. पोलिस पुढील तपास करीत आहेत.