पणजी: सध्या राज्यात सुरु असलेल्या विविध घटनांमुळे गोवा पोलिसांना नावं ठेवली जातायत, यावर बोलताना पोलीस महासंचालक (DGP) आलोख कुमार यांनी खेद व्यक्त केला. शुक्रवारी (दि. २० डिसेंबर) गोवा पोलीस स्थापना दिवसाच्या निमित्ताने बोलताना त्यांनी काही पोलीस अधिकाऱ्यांकडून केल्या जाणाऱ्या गैरवर्तवणुकीवर भाष्य केले. हणजूण येथील वाहतूक कर्मचाऱ्यांनी वसूल केलेली खंडणी किंवा अमित नाईकने आरोपी सुलेमान खानला पळून जायला केलेली मदत, कॅश फॉर जॉब स्कॅम अशा एकूणएक घटनांमुळे पोलिसांकवरचा विश्वास ढाळत चाललाय असं ते म्हणालेत.

गोवा पोलीस नेहमीच स्थानिक तसेच पर्यटकांच्या सुरक्षेसाठी दिवस आणि रात्र आटोकाट मेहनत करत असतात, मात्र काही पोलीस कर्मचाऱ्यांकडून उचलली गेलेली चुकीची पाऊलं त्याला गालबोट लावून जातात, यामुळे लोकांचा पोलिसांवरच विश्वास ढळतो आणि गोवा पोलिसांची बदनामी होते.

यावर लवकरच उपाय केला गेला पाहिजे असं म्हणत पोलिसांना नैतिकतेच्या मार्गावर आणण्यासाठी मानसिक घटकावरही भर दिला गेला पाहिजे असं डीजीपी म्हणाले. तसेच अशा घटनांवर आळा बसवण्यासाठी पोलिस अधीक्षक आणि पोलिस उपअधीक्षकांसह मध्यमस्तरीय अधिकाऱ्यांनी वेळोवेळी लक्ष घालण्याचे आवाहन त्यांनी केले.

पोलीस अधिकाऱ्यांना उत्तमोत्तम सुविधा मिळाव्यात म्हणून केपे,फातोर्डा,कुडतरी येथे नवीन इमारतींचं बांधकाम सुरू आहे, त्यामुळे आपण देखील जबाबदारी चोख बजावत राज्याची सुरक्षा निश्चित केली पाहिजे असे मार्गदर्शन डीजीपी आलोख कुमार यांनी गोवा पोलिसांना केले.