पेडणे: लग्नाचे आमिष देऊन महिलेवर लैंगिक अत्याचार केल्याची घटना उघडकीस आली आहे. याप्रकरणी न्हयबाग येथील व्यक्तीविरोधात पेडणे पोलिसांकडून गुन्हा नोंदवण्यात आलाय. संशियत व्यक्तीने पीडित महिलेला पाच लाख रुपयांचा गंडा देखील घातल्याचा आरोप पोलिसांकडे दाखल केलेल्या तक्रारीत करण्यात आला आहे.

पीडित महिलेने दिलेल्या तक्रारीवरुन पोलिसांनी राकेश (रा. न्हयबाग) याच्याविरोधात गुन्हा नोंदवला आहे.

पेडणे पोलिसांनी दिलेल्या माहितीनुसार, संशयित राकेशने पीडित महिलेसोबत मैत्री करुन लग्नाचे आमिष दिले. यानंतर तब्बल पाच वर्षे लैंगिक अत्याचार केल्याची तक्रार महिलेने दिली आहे. तसेच, वेळोवेळी विविध कारणांसाठी पाच लाख रुपये घेतल्याचे तक्रारीत म्हटलंय.

संशयिताने घेतलेले पैसे माघारी केले नाहीत तसेच, लग्नाचे वचन देखील पूर्ण केले नाही. पीडितेने तक्रार दाखल केल्यानंतर पोलिसांनी संशयित राकेश विरोधात गुन्हा नोंदवला असून, पोलिस संशयिताचा शोध घेत आहेत.