Goa Crime : आंतरराज्य चोरी प्रकरणांत हिटलिस्टवर असलेल्या ओडिशातील सराईत गुन्हेगार संतोष कुमार दास (42) याच्या पणजी पोलिसांनी मुसक्या आवळल्या आहेत. पणजी आणि पर्वरी येथे एकूण 48 घरे फोडणे, चोरी आणि दरोड्याच्या प्रकरणांमध्ये पोलिसांना तो हवा होता. आज अखेर तो पोलिसांच्या हाती लागला.

ओडिशातील नयागढ येथील रहिवासी असलेल्या दास याचा ओडिशात 15, आंध्र प्रदेशात 29 आणि कर्नाटकातील 4 चोरीच्या गुन्ह्यांमध्ये सहभाग असल्याची माहिती पोलिसांनी दिली. मिरामार स्किन क्लिनिकमधील 1.57 लाख रुपयांच्या चोरी प्रकरणाचा तपास करताना पोलिसांना त्याचा सुगावा लागला.

चोराने क्लिनिकच्या आवारातून सीसीटीव्हीचा डीव्हीआरही चोरला होता. त्याने डीव्हीआरमधून डेटा साफ केला आणि तो काकुलो कॉलनीजवळ फेकून दिला. पोलिसांना डीव्हीआर शोधण्यात यश आले असून त्यातील डेटाही मिळाला आहे. सीसीटीव्ही फुटेजमध्ये गुन्हेगार आवारात प्रवेश करताना दिसतो. शेजारच्या सीसीटीव्ही कॅमेऱ्याने निदर्शनास आणले की, त्या व्यक्तीने क्लिनिकमध्ये येण्यासाठी भाड्याची दुचाकी वापरली होती.