Goa Police: राजधानी पणजीतील एका सराफी दुकानात चोरी करून पसार झालेल्या चोरट्यांच्या टोळीला पणजी पोलिसांनी तपास करून बंगळुरू येथे ताब्यात घेऊन काल त्यांना गोव्यात आणले.

या टोळीने चोरलेले लाखो रुपयांचे सोन्याचे दागिने कोठे विकले याची माहिती उघड केलेली नाही. या टोळीमध्ये दोन महिलांचाही समावेश आहे. त्यांनी वास्को येथेही अशाच प्रकारचा गुन्हा केल्याची माहिती समोर आली आहे.

बंगळुरू येथे अटक करून आणलेल्या या टोळीने पणजीतील एका सराफी दुकानातून सोन्याचे दागिने चोरले होते. या घटनेची माहिती सीसीटीव्ही कॅमेऱ्यामध्ये कैद झालेल्या प्रकरणावरून उघड झाली होती.

ही घटना काही महिन्यांपूर्वीची आहे. पोलिसांनी सीसीटीव्ही कॅमेऱ्याच्या आधारे टोळीचा शोध घेण्याचा प्रयत्न केला.

पोलिसांना त्यानंतर केलेल्या चौकशीत ही टोळी चोरीनंतर बंगळुरूला गेल्याची माहिती समोर आली. त्यानुसार गोवा पोलिसांनी बंगळुरू पोलिसांच्या साहाय्याने या टोळीचा शोध सुरू केला.

ही टोळी अट्टल गुन्हेगार असल्याचे उघडकीस आल्याने पणजी पोलिसांनी बंगळुरू येथे जाऊन त्यांना गजाआड केले.