एस्कॉर्ट सर्व्हिसच्या नावाखाली वेश्या रॅकेट चालवणाऱ्या टोळीचा गोवा पोलिसांनी पर्दाफाश केला. या टोळीतील तिसऱ्या आरोपीच्या मुसक्या आवळण्यातही पोलिसांना आता यश आले आहे. उत्तरप्रदेशातील गाझीयाबादमधून या आरोपीला अटक करण्यात आली. योगेश कुमार असे या आरोपीचे नाव आहे. योगेशच्या शोधात गोवा पोलिसांच्या टीमने गाझियाबाद गाठले. यापूर्वी, या प्रकरणात सय्यद उस्मान (54, आंध्रप्रदेश) आणि महम्मद महबुल्ला (30, हरियाणा) या आरोपींना पोलिसांनी अटक केली आहे.

मिळालेल्या माहितीनुसार, योगेशच या रॅकेटचा मास्टरमांइड होता. त्यानेच deepikaverma.com नावाची वेबसाईट बनवली होती. घटनास्थळावरुन पोलिसांनी योगेशकडील सीपीयू जप्त केला. तसेच, आयटी कायद्याच्या कलम 67 अन्वये पोलिसांनी योगेशविरोधात गुन्ह्याची नोंद केली आहे.

या प्रकरणाशी संबंधित असलेल्या सुमारे 78 अश्‍लिल एस्कॉर्ट सर्व्हिस संकेतस्थळे ब्लॉक करण्यात आल्याची माहिती यापूर्वी क्राईम ब्रँचचे पोलिस अधीक्षक राहुल गुप्ता यांनी दिली होती. हे संशयित एस्कॉर्ट सर्व्हिस संकेतस्थळावर महिलांची अश्‍लिल छायाचित्रे प्रसिद्ध करुन गोव्यात एस्कॉर्ट सेवेची माहिती देत असत. त्यानंतर ते ग्राहक आणि दलाल यांच्या संपर्क साधायचे. दरम्यान, डीवायएसपी राजेश कुमार आणि एसपी क्राईम राहुल गुप्ता यांच्या देखरेखीखाली पीआय दत्ताराम राऊत यांच्या मार्गदर्शनाखाली प्रकरणाचा पुढील तपास सुरु आहे.