Goa Dona Paula Crime News

पणजी: दोनापावला येथे छापा टाकून गोवा पोलिसांच्या अमलीपदार्थ विरोधी पथकाने (एएनसी) पाच किलो गांजा जप्त केला होता. पोलिसांनी जप्त केलेला गांजा हा किरकोळ स्वरूपाचा आहे. संशयित नीतेश सिंग आणि राजू सिंग हे परराज्यातील असल्यामुळे त्या दोघांना कोठडीत ठेवता येत नसल्याचे निरीक्षण नोंदवत पणजी येथील अतिरिक्त सत्र न्यायालयाने या दोघांना २५ हजार रुपयांच्या वैयक्तिक जातमुचलका व इतर अटीवर जामीन मंजूर केला.

अंमलीपदार्थविरोधी कक्षाच्या पथकाने १३ सप्टेंबर रोजी रात्री ८.४५ ते मध्यरात्री ०.१५ वा. सापळा रचून दोनापावला (Dona Paula) येथील जीटीडीसीच्या पार्किंग परिसरात संशयास्पदपणे फिरत असताना दिसले. खबऱ्यांनी दिलेली माहिती तंतोतंत जुळत असल्यामुळे पथकाने त्या दोघांची चौकशी केली. दोघा संशयास्पद तरुणांना ताब्यात घेण्यात आले होते.

ही कारवाई खबऱ्यांनी दिलेल्या माहितीच्या आधारे करण्यात आली होती. पथकाने नीतेश सिंग याची झडती घेतली असता, त्याच्याकडून एका बॅगेत असलेला ५ किलो गांजा जप्त केला. बाजारपेठेत या गांजाचे पाच लाख रुपये असून याव्यतिरिक्त त्याच्याकडून १,५०० रुपये जप्त केले. त्याच्या सोबत असलेल्या राजू सिंग याची झडती घेतली असता त्याच्याकडून काहीच सापडले नाही. मात्र ते दोघे बरोबर गोव्यात आल्यामुळे ते या ड्रग्ज व्यवसायात गुंतल्याने त्या दोघांच्या विरोधात अमलीपदार्थ विरोधी कायद्याचे कलम अंतर्गत गुन्हा दाखल करून अटक केली होती.

चौकशीसाठी न्यायालयाने त्या दोघांना प्रथम पोलिस कोठडी ठोठावली व ती संपल्यानंतर न्यायालयीन कोठडी ठोठावली होती.