Sunburn Goa 2023 गोव्यातील यावर्षीचा सनबर्न संगीत महोत्सव मोपा येथे होणार असल्याची माहिती समोर आल्यानंतर पेडण्यातील नागरिकांनी त्याला विरोध दर्शवला. पेडणेवासियांनी यासंदर्भातले पत्र सरपंचांना लिहून सनबर्नला परवानगी न देण्याची मागणी केली आहे.

याच पार्श्वभूमीवर मांद्रेचे आमदार जीत आरोलकर यांनी पेडणे तालुक्यासाठी सनबर्न योग्य नसल्याचा पुनरुच्चार केलाय. सनबर्न हा पर्यटनदृष्ट्या महतवाचा इव्हेंट असून त्यात देश विदेशातील पर्यटक सहभागी होतात.

या फेस्टिवलच्या माध्यमातून पर्यंटन वाढणं ही चांगली गोष्ट असली तरी आपण आपली संस्कृती विसरणे हे योग्य नाही. पेडणे तालुक्यासाठी सनबर्न योग्य नाही असं माझं वैयक्तिक मत आहे असल्याचे मांद्रेचे आमदार जीत आरोलकर यांनी सांगितले.

पेडणे ही कलाकारांची खाण आहे, अशा परिस्थितीत जर सनबर्न या ठिकाणी आयोजित केला तर तो आमच्या स्थानिक कलाकारांवर अन्याय आहे. आयोजकांना हट्टाने जर सनबर्न पेडण्यातच करायचा असेल तर त्यांनी स्थानिकांना विश्वासात घेऊन या फेस्टिवलच्या माध्यमातून इथे रोजगार कसा उपलध होईल हे सविस्तर सांगणे आवश्यक असल्याचे आरोलकर यांनी सांगितले.

फेस्टिवलच्या माध्यमातून रोजगार उपलब्ध होण्याचे मार्ग असून देखील जर त्याला स्थानिकांचा विरोध असेल तर तो या तालुक्यातून रद्द करणेच योग्य होईल असे जीत आरोलकर यांनी गोमंतकीशी बोलताना सांगितले.