Revolutionary Goans पेडणे पालिका क्षेत्रात दीड कोटी रुपये खर्चून चार वर्षापूर्वी बांधलेल्या स्मशानभूमीची दुरावस्था झाली सरकार या स्मशानभूमीत अंत्यसंस्कारासाठी आवश्यक सुविधा देण्यातही अपयशी ठरले आहे, असा आरोप ‘आरजी’ पक्षाचे गौरेश मांद्रेकर यांनी केला.

या स्मशानभूमीत वीज व पाण्याची व्यवस्था नाही ती त्वरित करावी,अशी मागणी ‘रिव्होल्युशनरी गोवा’चे उत्तर गोवा अध्यक्ष गौरेश मांद्रेकर यांनी केला. पत्रकार परिषदेला आरजीचे कार्यकर्ते सुजय म्हापसेकर, अध्यक्ष शिवानंद तांबोसकर, तेजस देऊस्कर, विशाल आसोलकर उपस्थित होते.

शिवानंद तांबोसकर म्हणाले की ,स्मशानभूमी २०१९ साली बांधली.पण त्याला वीज व पाणी पुरवठा न केल्याने क्रियाकर्म झाल्यानंतर बरीच गैरसोय होते. पेडणे नगरपालिकेने यांत लक्ष घालून या स्मशानभूमीत वीज व पाण्याची त्वरित व्यवस्था करावी. पेडणेतील स्मशानभूमीच्या समस्या तातडीने सोडवा,अशी मागणीही करण्यात आली.

पेडणे तालुक्यातील अनेक गावांत पक्क्या स्वरूपाच्या स्मशानभूमी नाहीत. पावसाळ्यात किंवा रात्रीच्यावेळी अंत्यसंस्कार करणे अतिशय त्रासदायक ठरते. अंत्यसंस्कारासाठी मृतदेह या स्मशानभूमीत आणले जातात. पण या स्मशानभूमीत आवश्यक त्या सोयीसुविधा नसल्याने लोकांची मोठी गैरसोय होते. सरकारने या गैरसोयी तातडीने दूर करायला हव्यात.

-तेजस देऊस्कर, पेडणे