Goa News: नरकासुर प्रतिमा पाहण्यासाठी गर्दी वाढणार असल्याने पणजीतील वाहतूक व्यवस्थेत बदल करण्यात आला आहे. पोलिस निरीक्षक ब्रेंडन डिसोझा यांनी दिलेल्या माहितीप्रमाणे 23 सोमवार रोजी टी. बी. इस्पितळ ते भाटले राम मंदिर हा मार्ग एकेरी असणार आहे.

चार पिलरच्या बाजूने येणारी वाहने भाटले राम मंदिराकडून आल्तिनोच्या दिशेने वळवली जाणार आहेत. तसेच एस एफ एक्स चॅपल, मारूती मंदिर जे. बी. बेकरी, बाबू फार्मासी, ते हेल्थ वे पर्यंतचा रस्ता एकेरी असणार आहे.

तांबडी मातीमार्गे सांतिनेजहून येणारी वाहने बाशिकाच्या घरांकडून वळवण्यात येतील. अग्निशमनदलाकडून पणजीत येणाऱ्या वाहनांना उजव्या हाताला वळायला दिले जाणार नसल्याचे त्यांनी सांगितले. श्री महालक्ष्मी मंदिर ते बॉक द वॉक रस्ता सर्व वाहतुकींसाठी बंद राहणार आहेत.