Panjim Smart City: राजधानी पणजीची स्मार्ट योजनेखाली निवड होऊनही गेल्या आठ-नऊ वर्षात अशी स्थिती झालेली आहे की त्यामुळे सरकारी यंत्रणाच तोंडघशी पडत आहेत.

2015 मध्ये कामाला सुरवात झालेल्या स्मार्ट सिटीबाबत अनुभव वेगळाच आहे. गेली सात -आठ वर्षे केवळ खोदकाम तेवढे सुरु आहे.

मागील वर्षभरात या खोदकामामुळे वाहनचालकांसह पादचाऱ्यांनाही बराच मनस्ताप सहन करावा लागलाय. रस्ता खचून वाहने अडकण्याच्या घटना तर कित्येकवेळा घडल्या आहेत.

आज सोमवारी आठवड्याच्या सुरुवातीलाच एक मालवाहक टेम्पो रस्ता खचल्यामुळे अडकून पडल्याची घटना घडली. सोमवारी सकाळच्या वेळेस आझाद मैदानाजवळ हा प्रकार घडल्याची माहिती समोर आलीय.

तर पणजीच्या सांतिनेज भागात दररोज ये-जा करणाऱ्या नागरिकांचा जणू सहनशीलतेचा अंतच पाहिला जात चित्र दिसत आहे. ख्रिश्चन समुदायाच्या स्मशानभूमीसमोर चेंबरचे काम सुरू आहे. चेंबरच्या खड्ड्यातून पाणी उपसा करून तो रस्त्यावरच सोडला जात आहे.

हे पाणी रस्त्याच्या बाजूला असणाऱ्या खड्ड्यात जाऊन साचते. येथून चार चाकी वाहनांना त्यातून सहज मार्ग काढता येतो, परंतु दुचाकीस्वारांना व पादचाऱ्यांना जीव मुठीतच घेऊन ये-जा करावे लागतेय.

वास्तविक पाहता या सगळ्या प्रकाराबद्दल आता तर भाजपवालेही नाक मुरडत आहेत.पणजीचे आमदार असलेले आमदार तथा मंत्री बाबूश मॅान्सेरात यांनी याच संदर्भात स्व. मुख्यमंत्री मनोहर पर्रीकरांवर केलेली शेरेबाजी हेही त्याचेच प्रतीक आहे.

स्मार्ट सिटी प्रकल्पाखाली पणजी शहरातल्या सांतिनेज तसेच इतर भागातही विविध कामे हाती घेण्यात आली असून जिथे तिथे रस्ते खोदून ठेवले आहेत. सांतिनेज येथील अनेक व्यावसायिक, दुकानदारांवर आपला व्यवसाय बंद करण्याची वेळ ओढवल्याचे ते सांगत आहेत.

'गोमन्तक'ने जेव्हा सांतिनेज येथील काही व्यावसायिकांशी भेटून त्यांची व्यथा जाणण्याचा प्रयत्न केला तेव्हा त्यांना धूळ प्रदूषण, धंद्यात मंदी, श्वसनाचे आजार, गिऱ्हाईक न येणे अशा गोष्टींना रोज सामोरे जावे लागत असल्याचे दिसून आले.