Goa Election: जिल्हा पंचायतीच्या दवर्ली आणि रेईश मागूस या दोन रिक्त जागांसाठी भाजप आज आपले उमेदवार जाहीर करणार आहे. मात्र, कुठ्ठाळीत अपक्ष आमदार अंतिन्हो वाझ यांच्या उमेदवाराला पाठिंबा राहिल, अशी माहिती भाजप प्रदेशाध्यक्ष सदानंद शेट तानावडे यांनी काल दिली. तर काँग्रेसने आपले दोन व आरजी ने आपले तिन्ही उमेदवार जाहीर केले आहेत.

जिल्हा पंचायतीच्या दवर्ली आणि रेईश मागूस या जागा भाजप तर कुठ्ठाळीची जागा अपक्ष उमेदवाराने जिंकली होती. भाजप आताही तीच रणनीती ठेवत दवर्ली व रेईश मागूसची जागा लढवणार आहे.

भाजप सरकारला पाठिंबा दिल्याने कुठ्ठाळीची जागा अपक्ष आमदार अंतोनियो वाझ यांच्या उमेदवाराला सोडण्याची ठरवली आहे. दुसरीकडे आरजीने दवर्ली-अँड्र्यू रिबेलो, कुठ्ठाळी-लेस्ली गामा आणि रेईस मागुस येथून साईनाथ कोरगावकर यांना उभे केले आहे.

काँग्रेसकडून दोन उमेदवार जाहीर

मडगाव जिल्हा पंचायत पोटनिवडणुकीसाठी काँग्रेसने आपले उमेदवार काल जाहीर केले आहेत. दवर्ली मतदारसंघासाठी लियोन्सीओ रायकर, तर कुठ्ठाळीतून वालेंत बार्बोजा यांच्या नावांची घोषणा प्रदेशाध्यक्ष अमित पाटकर यांनी केली.

रायकर व बार्बोजा यांना नुकतेच काँग्रेस पक्षात सामील करून घेण्यात आले होते. रेईस मागुस मतदारसंघाचा उमेदवार लवकरच जाहीर करण्यात येईल, असे पाटकर यांनी सांगितले.