राज्यातील पंचायत निवडणुकांची मुदत 20 जूनला संपत असली तरी मे महिन्यात शेवटच्या आठवड्यात या निवडणुका घेण्यात येणार आहेत. जून महिन्यात शाळा सुरू होतात तसेच पावसाळा सुरू असल्याने त्यापूर्वीच निवडणूक प्रक्रिया पूर्ण करण्याचे ठरविण्यात आले आहे. मात्र, निवडणूक तारीख प्रभाग फेररचना व आरक्षण प्रक्रिया पूर्ण झाल्यानंतर ठरविण्यात येईल अशी माहिती राज्य निवडणूक आयुक्त डब्ल्यू. व्ही. रमणामूर्ती यांनी दिली होती.

दरम्यान, आता पंचायत (Panchayat) निवडणुका जूनच्या पहिल्या आठवड्यात होणार असल्याचे सांगत फेररचना झाली आहे. आता राज्य निवडणूक आयोग प्रभाग आरक्षणाचे काम करेल. त्यानंतर जूनच्या पहिल्या आठवड्यात निवडणूक (elections) होऊ शकतात, अशी माहिती पंचायत मंत्री मॉविन गुदिन्हो‌ यांनी दिली आहे.

सुधारणेसाठी 913 सूचना

190 पैकी 186 पंचायतीची ही निवडणूक होणार असून त्यासाठी पंचायत प्रभागांसाठी तयार करण्यात आलेला फेरररचना मसुदा लोकांना पाहण्यासाठी ठेवण्यात आला होता. त्याची मुदत गेल्या 4 मार्चला संपली. प्रभाग फेररचनेत सुधारणा करण्यासाठी 913 सूचना आल्या आहेत. त्यापैकी 650 उत्तर गोव्यातून (North Goa) तर दक्षिण गोव्यातून 363 हरकती व सूचना आलेल्या आहेत. यामध्ये प्रभाग बदलल्याप्रकरणी व एकच घर क्रमांक काहींच्या बाबतीत झाला आहे. याव्यतिरिक्त जवळ असलेल्या मतदान केंद्राऐवजी दूर ठिकाणी त्याचा समावेश करणे याचा समावेश आहे.