Goa News: सरकारच्या खनिज आणि भूगर्भशास्त्र खात्याच्या वतीने जाहीर केलेल्या पहिल्या चार ब्लॉक्सच्या ई-लिलावाची प्रक्रिया सुरू असून आणखी चार ई-ब्लॉक्ससाठीची तयारी खनिज खात्याच्या वतीने सुरू असल्याची माहिती खात्याचे संचालक डॉ. सुरेश शानभोग यांनी दिली. तर दुसरीकडे ई-लिलावासाठी नीती आयोगाची मदत घेणार असल्याचे मुख्यमंत्री डॉ. प्रमोद सावंत यांनी म्हटले आहे.

खनिज खात्याच्या वतीने एमएसटीसी ई-कॉमर्स आणि सीबीआय कॅप यांच्या सहकार्याने डिचोली, शिरगाव-मये, मोंत द शिरगाव आणि काले या चार खनिज ब्लॉक्सचा ई-लिलाव जाहीर केला आहे. यासाठीच्या लिलाव प्रक्रियेमधला सहभाग वाढवण्यासाठी मुदतवाढ देण्यात आली आहे.

यापूर्वी लिलाव दस्तऐवज खरेदी करण्याची तारीख 15 नोव्हेंबर होती, ती आता २२ नोव्हेंबरपर्यंत वाढवण्यात आली आहे, तर सर्व कागदपत्रांसह बीड सादर करण्याची तारीख 21 नोव्हेंबर होती, ती आता 28 नोव्हेंबरपर्यंत वाढवण्यात आली आहे.

मात्र, लिलावाच्या अंतिम तारखेमध्ये कोणत्याही प्रकारचा बदल केलेला नाही. 15 ते 21 डिसेंबरपर्यंत या चार ब्लॉक्सचा लिलाव पूर्ण करण्यात येईल, अशी माहिती खात्याचे संचालक डॉ. शानभोग यांनी दिली. याशिवाय आणखी चार ब्लॉक्सची माहिती गोळा करण्याचे काम खात्याच्या वतीने पूर्ण करण्यात आले आहे.

नीती आयोगाची मदत घेणार

खनिज डंप आणि सबग्रेड खनिज असलेल्या डंपमुळे जमीन पडीक ठेवावी लागत असल्याचा दावा करून या डंपच्या ई-लिलावासाठी नीती आयोगाने मदत करावी, अशी मागणी आयोगाच्या सदस्यांकडे केली असल्याची माहिती मुख्यमंत्र्यांनी दिली. यासाठी सर्वोच्च न्यायालयाची मदत घेणार असल्याचेही मुख्यमंत्री डॉ. प्रमोद सावंत यावेळी म्हणाले.