Babush Monserrate: 2008 साली रायन गुदिन्हो याला मारहाण केल्याप्रकरणी संशयितांना गजाआड करण्यात पोलिसांकडून विलंब होत असल्याने पणजी पोलिस स्थानकावर मोर्चा घेऊन आलेल्या तत्कालीन आमदार व विद्यमान मंत्री बाबूश मोन्सेरात यांनी सोबत आलेल्या कार्यकर्त्यांच्या जमावासमोर भाषण करून त्यांना भडकावून कायदा हातात भाग घेण्यास पाडले, अशी जबानी आज या पोलिस निरीक्षक तुषार लोटलीकर यांनी न्यायालयात दिली.

जबानी नोंदवण्‍याचे काम पूर्ण न झाल्याने 29 नोव्हेंबरला ती ठेवण्यात आली आहे. मंत्री मोन्सेरात यांनी 19 फेब्रुवारी 2008 साली सांपॉल - ताळगाव येथून कार्यकर्त्यांसोबत चालत पणजी पोलिस स्थानकापर्यंत संध्याकाळच्यावेळी मोर्चा काढला होता. ताळगाव येथील रायन याला झालेल्या मारहाणीतील तिघा संशयितांना अटक करण्याची मागणी करण्यात आली होती.

रात्री साडेनऊ वाजले, तरी कोणतीच कारवाई होत नसल्याने मंत्री मोन्सेरात यांनी पोलिस स्थानक प्रमुखाला निलंबित करण्याची मागणी करत होते. तरीही ती पूर्ण न झाल्याने त्यांनी कार्यकर्त्यांसमोर भडकवणारे भाषण केले होते. या मोर्चामध्ये माजी दोन महापौर टोनी रॉड्रिग्ज व उदय मडकईकर, जेनिफर मोन्सेरात, दया कारापूरकर यांचा समावेश होता.

सीबीआयकडे याप्रकरणी दिलेल्या तक्रारीवर असलेली सही माझीच आहे, असे सत्र न्यायालयात लोटलीकर यांनी जबानीत सांगितले. सीबीआयने हे आरोपपत्र बाबूश मोन्सेरात याच्यासह 36 जणांविरुद्ध सादर केले आहे.

पूर्वनियोजित कट

पोलिस स्थानकावरील हल्ल्यासाठी जमावाने आणलेल्या बाटल्या व दगड ताळगाव येथून आणले होते व त्यातील काही पुरावे म्हणून या प्रकरणांतील संशयितांच्या निवासस्थानाच्या परिसरातून जमा केले होते. त्यामुळे हा पूर्वनियोजित कट असल्याचे सीबीआयच्या वकिलांनी न्यायालयाच्या निदर्शनास आणून दिले.

दोघेही साध्या वेशात

हल्ल्यावेळी तेथे बाबूश मोन्सेरात व त्यांची पत्नी जेनिफर मोन्सेरात व इतर होते हे साध्या वेशात असलेल्या पोलिसांनी त्यांची ओळख पटविली आहे. हा खटला रद्द करण्यासाठी संशयितांनी उच्च न्यायालयात याचिका सादर केली होती. मात्र उच्च न्यायालयाने त्यांची विनंती फेटाळून लावत सत्र न्यायालयाला त्वरित सुनावणी सुरू करण्याचे निर्देश देण्यात आले होते.