Babush Monserrate: गोव्यात 1.10 लाख बेरोजगार असल्याची आकडेवारी नीती आयोगाने आपल्या अहवालात जाहीर करून चिंता व्यक्त केली आहे, परंतु ही आकडेवारी कामगार खात्याने नीती आयोगाला दिलीच नव्हती.

खात्याच्या संचालकांनी याची पुष्टी केली आहे की, त्यांनी रोजगारसंबंधी माहिती नीती आयोगाला देण्यात आलेली नाही. त्यामुळे ही माहिती नीती आयोगाला कोणी दिली याची चौकशी करणार आहे, असे स्पष्टीकरण कामगारमंत्री आतानासियो ऊर्फ बाबूश मोन्सेरात यांनी दिले आहे.

पर्वरीतील विधानसभा संकुलात ते पत्रकारांशी बोलत होते.

कामगार खात्यानेच ही माहिती दिली होती किंवा दिली असावी असे मला वाटत होते. यासंदर्भात खात्याच्या संचालकांना विचारले असता त्यांनी ती दिली नसल्याचे स्पष्ट झाले आहे. त्यामुळे ही माहिती कोणी दिली हा प्रश्‍न अनुत्तरीत राहतो, कारण माहिती मुळात चुकीची होती.

त्यामुळे राज्याच्या छबीवर परिणाम झाला आहे. नागरिकांमध्ये चुकीचा समज निर्माण होऊ शकतो. माहिती कोणी दिली हे शोधून काढणार आहे, असे मोन्सेरात यांनी स्पष्ट केले.