National Senior Women's Football अखेरच्या साखळी लढतीत गोव्याला ओडिशाविरुद्ध 1-1 गोलबरोबरीवर समाधान मानावे लागले. त्यामुळे 27 व्या राष्ट्रीय सीनियर महिला फुटबॉल स्पर्धेत त्यांना मुख्य फेरी गाठण्यास अपयश आले. हिमाचल प्रदेशने आंध्र प्रदेशचा 19-1 असा धुव्वा उडवून गट तीनमध्ये अव्वल स्थान मिळविले.

स्पर्धेच्या गट तीन साखळी फेरीतील सामने रविवारी फातोर्डा येथील पंडित जवाहरलाल नेहरू स्टेडियमवर झाले. सकाळच्या सत्रात हिमाचल प्रदेशने दणदणीत विजय नोंदविल्यामुळे त्यांचे पारडे जड राहिले.

अंजू हिने सात, पूनमने चार, मनीषाने तीन, रिया शर्मा व नकेता यांनी प्रत्येकी दोन, तर निशा हिने एक गोल नोंदवत हिमाचल प्रदेशला तिसरा विजय मिळवून दिला. त्यांचे चार लढतीनंतर 10 गुण झाले.

गोमंतकीय प्रशिक्षक वामन च्यारी यांच्या मार्गदर्शनाखालील हिमाचल प्रदेशने स्पर्धेत सर्वाधिक 41 गोल नोंदविले, तर फक्त चार गोल स्वीकारले. आंध्र प्रदेशला तिसरा पराभव पत्करावा लागला, त्यामुळे चार लढतीनंतर त्यांचे तीन गुण कायम राहिले. त्यांच्यासाठी एक मात्र गोल कोल्लुरू अनुराधा हिने केला.

यजमान संघ गटात तिसरा

ओडिशाविरुद्ध कॅरेन एस्ट्रोसियो हिने 45 व्या मिनिटास गोव्याला आघाडी मिळवून दिली. त्यानंतर 65 व्या मिनिटास सत्यबती खाडिया हिने ओडिशासाठी बरोबरीचा गोल केला. दोन्ही संघांना प्रत्येकी एक गुण मिळाला.

ओडिशाचे चार लढतीनंतर आठ गुण झाले व त्यांना गट तीनमध्ये दुसरा क्रमांक मिळाला. दोन विजय, एक बरोबरी व एक पराभव अशा कामगिरीसह सात गुण नोंदवून गोव्याचा संघ तिसऱ्या क्रमांकावर कायम राहिला.