मडगाव: वेळ्ळीचे माजी आमदार बेंजामिन सिल्वा (Benjamin Silva) याना काँग्रेसमध्ये (Congress) घेण्यास एका गटाचा तीव्र विरोध असून त्याचे पडसाद आज त्यांच्या प्रवेशाच्यावेळी उमटले. वेळ्ळीतील काँग्रेस तिकिटाचे आणखी एक दावेदार सावियो डिसिल्वा (Savio D'silva) यांच्या समर्थक गटाने आज दक्षिण गोवा काँग्रेस कार्यालयात धुमाकूळ घालत ज्याने आतापर्यंत फक्त काँग्रेस विरोधीच काम केले त्या बेंजामिन सिल्वा यांना पक्षात घेतलेच जाते कसे असा सवाल प्रदेशाध्यक्ष गिरीश चोडणकर (Girish Chodankar) आणि विरोधी पक्षनेते दिगंबर कामत याना विचारण्यात आला. यावेळी काँग्रेस कार्यालयात बेंजामिन आणि सावियो यांच्या समर्थकांमध्ये एक प्रकारचे धुमशान माजले.

काँग्रेसचे जिल्हा पंचायत सदस्य ज्युलिओ फेर्नांडिस यांनी यावेळी बेंजामिन सिल्वा याना काँग्रेस पक्षात प्रवेश देऊन वेळ्ळीत काँग्रेस संपविण्याचा हा प्रयत्न असे सांगितले. तर काँग्रेस सेवादलच्या महिला आघाडीच्या अध्यक्ष आंतोनेत डायस यांनी वेळ्ळीतील काँग्रेस दिगंबर कामत आणि गिरीश चोडणकर हे खिळखिळी करायला उठले आहेत असा आरोप केला.

आज सिल्वा याना काँग्रेस पक्षात प्रवेश देण्याचा सोहळा मडगाव कार्यालयात आयोजित करण्यात आला होता. यावेळी कामत, चोडणकर आणि इतर पदाधिकारी उपस्थित होते.