१९६१ साली गोवा मुक्त झाल्यानंतर सत्तेवर आलेल्या प्रत्येक सरकारने गोव्याच्या विकासात आपल्या परीने भर घातली असली तरी सध्या डॉ. प्रमोद सावंत यांच्या नेतृत्वाखालील सरकारने गोव्याला विकासाच्या नव्या वाटेवर नेले आहे असे मत सार्वजनिक बांधकाम खात्याचे मंत्री निलेश काब्राल यांनी व्यक्त केले.

आज मडगाव येथे गोवा मुक्तीदिन सोहळ्याच्या निमित्ताने आयोजित केलेल्या कार्यक्रमात ते बोलत होते. यावेळी त्यांनी तिरंगा ध्वज फडकावून पोलिसांची मानवंदना स्वीकारली. यावेळी आमदार आलेक्स सिकेरा, रेजीनाल्ड लॉरेन्स, उल्हास तुयेकर, दक्षिण गोव्याच्या जिल्हाधिकारी ज्योती कुमारी, पोलीस अधीक्षक गुरुदास गावडे तसेच अन्य मान्यवर उपस्थित होते.

भारत देश जी -२० देशाची शिखर परिषद भारतात आयोजित करत असून त्यातील काही बैठका गोव्यात होणार असल्याने गोव्यासाठी पर्यटनाची आणखी कवाडे खुली होतील असा विश्वास त्यानी व्यक्त केला. यावेळी सासष्टी तालुक्यातील विविध शाळामधील विद्यार्थ्यांनी कार्यक्रम सादर केले. कार्यक्रमाचे सूत्रसंचालन अनिल पै यांनी केले.