Goa Weather Update: राज्यात पावसाचा जोर मंदावला असला तरीदेखील पाऊस पुन्हा सक्रिय होण्याची चिन्हे दिसत आहेत. राज्यात पुढील पाच दिवस मध्यम स्वरूपातील पावसाची शक्यता वर्तवत गोवा वेधशाळेने ‘यलो अलर्ट’ जारी केला आहे.

तसेच भारतीय महासागर सूचना सेवा केंद्राने शापोरा ते पणजी (Panjim) तसेच वास्को ते कोळंब भागातील समुद्रात उद्या (गुरुवारी) दुपारी २.३० च्या सुमारास दोन ते अडीच मीटर उंचीच्या लाटा उसळणार असल्याचे म्हटले आहे.

राज्यात मागील २४ तासांत केवळ १६.५ मिमी पावसाची नोंद करण्यात आली. मागील २४ तासांत सर्वाधिक ७२.२ मिमी पावसाची नोंद मुरगाव येथे करण्यात आली, असून त्याखालोखाल दाबोळी २०.६ मिमी, मडगाव १९.७ मिमी, पेडणे १६.४ मिमी, साखळी १५.८ मिमी, म्हापसा १३ मिमी, केपे १२ मिमी, वाळपई ८.९ मिमी, पणजी ८.५ मिमी, सांगे ७.१ मिमी, जुने गोवे ३.४ मिमी, फोंडा २.८ मिमी, काणकोण २.२ मिमी पावसाची नोंद करण्यात आली.

आज पणजी येथे कमाल ३२.३ तर किमान २५.६ अंश सेल्सिअस तापमानाची नोंद करण्यात आली. राज्यात सर्वाधिक ९८ टक्के आर्द्रतेची नोंद करण्यात आली.

...तर पाऊस इंचांची विशी ओलांडणार

राज्यात आतापर्यंत एकूण ४७२ मिमी म्हणजेच १८.५० इंच पावसाची नोंद करण्यात आली आहे. जर गुरुवारी राज्यात मोठ्या प्रमाणात पाऊस पडला तर एकूण २० इंच पावसाची नोंद होण्याची शक्यता आहे. राज्यात आतापर्यंत ५३२ मिमी पाऊस होणे अपेक्षित होते; परंतु सरासरी पावसाच्या तुलनेत राज्यात ११.४ टक्के पावसाची कमतरता आहे.