पणजी : राज्यात गेल्या २ आठवड्यापासून वाढणाऱ्या कोरोनाचा धोका दिवसेंदिवस वाढत आहे. पॉझिटिव्ह रेट १० टक्क्यांच्यावर असून रुग्णालयात भरती होणाऱ्यांची संख्याही अद्याप वाढत आहे. आज ५ रुग्णांना अधिकच्या उपचारासाठी रुग्णालयात दाखल करण्यात आले. तर नवे १२० बाधित सापडले आहेत. यामुळे नागरिकांनी ‘एसओपी’चे पालन करावे, असे आवाहन आरोग्य खात्याच्या वतीने करण्यात आले आहे.

आरोग्य खात्याचे साथीचे रोग विभाग प्रमुख डॉ.प्रशांत सूर्यवंशी म्हणाले आजचाही पॉझिटिव्हिटी रेट १० टक्क्यांच्या वर आहे. उपचारांसाठी भरती होणाऱ्या रुग्णांची संख्याही वाढत आहे. त्यामुळे ‘एसओपी’चे पालन करणे अनिवार्य बनले आहे. आज कोरोनाच्या नव्या १२० बाधितांसह एकूण बाधितांचा आकडा ५१८ झाला आहे.

आज घेतलेल्या ९८६ संशियतांच्या चाचण्यांपैकी १२० नवे बाधित सापडले. कोरोना मुळे आज मृत्यू नसल्यामुळे बळींचा आकडा ४०१४ कायम आहे. राज्यात आतापर्यंत २,५९,९३३ जणांना कोरोनाची लागण झाली होती. त्यापैकी २,५५,४०१ नागरिक पूर्णतः बरे झाले असून हे बरे होण्याचे प्रमाण ९८.२६ टक्के आहे.

सध्या राज्यातील वाढत्या कोरोना रूग्णांच्या पार्श्वभूमीवर भीतीचे वातावरण पसरले आहे. दक्षता म्हणून कोरोनाची लक्षणे आढळणाऱ्यांनी जवळच्या आरोग्य केंद्राकडे तसेच डॉक्टरांकडे धाव घेतली असल्याचे आढळून येत आहे.