Goa Murder Case: राज्यात मागील काही दिवसांपासून खुनाच्या काही घटना समोर आल्या आहेत. अशीच एक घटना दवर्लीमध्ये घडली आहे.

दवर्ली हाऊसिंग बोर्डमध्ये सादिक बेल्लारी नामक व्यक्तीचा खून झाल्याची धक्कादायक माहिती समोर आली आहे. मायणा-कुडतरी पोलीस घटनास्थळी दाखल झाले असून या घटनेचा अधिक तपास सुरू आहे.

पूर्ववैमनस्यातून खून झाल्याचा अंदाज...

माहितीनुसार, 2020 मध्ये मुझाहिद खानच्या हत्येप्रकरणी मायणा-कुडतरी पोलिसांनी सादिक बेल्लारीला अटक केली होती. यानंतर हल्लीच 3 महिन्यांपूर्वी त्याची जामिनावर सुटका करण्यात आली होती. मात्र सादिक विरोधी गटाच्या रडारवर होता. अनेकदा विरोधी गटाकडून त्याला धमकावण्यात आल्याचे सांगण्यात येत आहे.

सादिकच्या शेवटच्या सुनावणीवेळीही विरोधी गटाकडून त्याला धमकावण्यात आले होते. त्यावेळी याबाबत त्याने फातोर्डा पोलिसांत तक्रारही दाखल केली होती.

आज सादिकचे आई-बाबा बाहेर गेले तेव्हा सादिक एकटाच घरी होता. त्यावेळी अज्ञातांनी घरात घुसत सादिकवर हल्ला केला आणि धारधार शस्त्राने त्याचा गळा कापला. हा हल्ला इतका अनपेक्षित होता की सादिकला स्वत:चा बचाव करण्यासाठी वेळच मिळाला नाही.

पोलीस सध्या सीसीटीव्ही तपासून आरोपींचा शोध घेत आहेत. दरम्यान, सादिकच्या घराबाहेर लोकांनी गर्दी केली असून सर्वजणच या घटनेमुळे घाबरून गेले आहेत. सासष्टी पोलिस उपअधीक्षक संतोष देसाई हे या घटनेकहा पुढील तपास करत आहेत.