मोरजी : पेडणे पालिकेची नवीन प्रशासकीय इमारत ‘सुडा’मार्फत उभारली जात आहे. मात्र कंत्राटदाराच्या हलगर्जीपणामुळे या इमारतीचे काम दिवसेंदिवस रखडत चालले आहे. त्‍यामुळे खर्चही वाढत चालला आहे. कदंब महामंडळाला सात लाखांपेक्षा जास्त भाडे द्यावयाचे आहे. ते भाडे सरकारने माफ करावे असा ठराव मांडायचा का?

अशी विचारणा नगराध्यक्ष सिद्धेश पेडणेकर यांनी पालिकेच्‍या बैठकीत केली असता आमदार प्रवीण आर्लेकर यांनी सूचना करताना सांगितले की, हे भाडे कंत्राटदाराने भरायला हवे. एका बैठकीत त्‍याच्‍याशी चर्चा करुया.

पेडणे पालिका क्षेत्रातील जी बेकायदा घरे व दुकाने आहेत, त्यांच्याकडून दोन टक्के करवसुली करणे, गटार व्यवस्था नीटनेटकी करणे, घरे-हॉटेलांचे गटारात सोडले जाणारे सांडपाणी आदी विषयांवरही बैठकीत गरमागरम चर्चा झाली. शिवाय विविध विकासकामांवर विचारविनिमय करण्‍यात आला.

आमदार प्रवीण आर्लेकर व नगराध्यक्ष सिद्धेश पेडणेकर यांच्या उपस्थितीत झालेल्‍या या बैठकीला मुख्याधिकारी अनिल राणे, उपनगराध्यक्ष आश्विनी पालयेकर आणि नगरसेवक व अभियंते उपस्थित होते.