मोपा विमानतळाला नागरी विमान वाहतूक महासंचालनालयाकडून आंतरराष्ट्रीय विमानतळासाठी सुरक्षेचा परवाना मिळाला आहे. यामुळे मोपा सर्व प्रकारची विमान उड्डाणे हाताळण्यासाठी सुरक्षित असल्याचे जाहीर झाले. त्यामुळे आता मोपाला उद्‍घाटनाचे वेध लागले आहेत.

मोपावरून 5 ऑक्टोबर रोजी उतरणे आणि उड्डाण (लँडिंग अँड टेकऑफ) यशस्वीरित्या पूर्ण केल्यानंतर धावपट्टीची चाचणी यशस्वी झाली होती. यानंतर डीजीसीएकडून संपूर्ण धावपट्टीची पाहणी करून विमान उतरण्याचा आणि उड्डाण करण्यासाठी आवश्यक असलेला परवाना देण्यात आला आहे.

दरम्यान, उद्‍घाटन सोहळ्याला पंतप्रधान नरेंद्र मोदी उपस्थित राहाणार असल्याने मुहूर्त अद्याप ठरलेला नाही. मात्र, डिसेंबरच्या पहिल्या किंवा दुसऱ्या आठवड्यामध्ये पंतप्रधान या विमानतळाचे जाहीर उद्‍घाटन करतील अशी माहिती आहे.