Goa Monsoon Update 2023: सध्या पावसाने रौद्र रूप धरण केले असून राज्यभरात पडझडीच्या घटनांमध्ये वाढ झाली आहे. यामुळे नागरिकांना समस्यांचा सामना करावा लागत आहे. आज सत्तरीमधील एक घर जमीनदोस्त झाल्याची धक्कादायक घटना घडली आहे.

दुसरीकडे पावसामुळे, फोंड्यातील भारत गॅस एजन्सीच्या कार्यालयाची स्थिती अत्यंक बिकट बनली आहे. दररोज कार्यालयाच्या सिलींगचा काही भाग कोसळत चालला आहे. कार्यालयात काम करणाऱ्या कर्मचाऱ्यांना जीव मुठीत घेऊन काम करावे लागत आहे.

मुळात या कार्यालयाची पूर्ण इमारतच जुनी असून सध्या जिर्णावस्थेत आहे. त्यामुळे त्वरित कोणतीही दुर्घटना होण्याआधी सरकारने याकडे लक्ष देण्याची मागणी करण्यात येत आहे.

दरम्यान, केरीहून केळावडे-रावणला जाणाऱ्या मार्गावर लागणाऱ्या साटी आणि गटारो या ओढ्यांना मुसळधार पावसामुळे पूर आल्याने त्यावरचे छोटे पूल पाण्याखाली गेले आहेत.

तर, वाळपई नगरपालिका प्रभाग 10 मध्ये नायदा रिवाज खान यांच्या घरावर पेरुचे झाड पडून 20 हजारांचे नुकसान झाले आहे. तसेच पर्ये-सत्तरी येथे कृष्णा बाबी राणे यांच्या मातीच्या घरावर रानटी झाड पडल्याने 15 हजारांचे नुकसान झाल्याचे सांगण्यात येत आहे.