Goa Monsoon 2023 डिचोली आणि नजीकच्या परिसरात गडगडाटासह परतीच्या पावसाने हजेरी लावली. दुपारपासून उत्तर गोव्यात काही ठिकाणी ढगाळ वातावरण झाले होते. संध्याकाळी 4 च्या सुमारास गडगडाटासह पावसाला सुरुवात झाली. दरम्यान या पावसामुळे तयार झालेले पीक आडवे पडण्याची शक्यता निर्माण झाल्याने शेतकरीराजा चिंतेत पडला आहे.

तालुक्यातील डिचोली-सत्तरी परिसरात आज (ता.15) दुपारी वादळी वाऱ्यासह पावसाने हजेरी लावली. पावसासोबत हवेचा वेगही प्रचंड होता. या वादळी पावसाने शेतीचे नुकसान होण्याची चिंता शेतकऱ्यांनी व्यक्त केलीय. दाणा तयार झालेले पीक शेतात पडल्यास हंगामातल्या मेहनतीवर पाणी फिरणार असल्याची खंत शेतकऱ्यांनी बोलून दाखवलीय.

या पावसामुळे सत्तरी भागात बऱ्याच ठिकाणी पडझडीच्या घटना घडल्या. नाणूस - फोंडा रस्त्यावर वीजखांब तुटून पडल्याने भर रस्त्यात विजेच्या तारा पसरल्या होत्या. परिणामाची या मार्गावरची वाहतूक काही काळ ठप्प झाली होती.

मात्र वीज वितरणाचे कर्मचारी आणि अग्निशामक दलाचे जवान तातडीनं घटनास्थळी दाखल होत त्यांनी महामार्गावर पडलेली झाडे तोडून आणि वीज तारा बाजूला करून वाहतूक सुरळीत करण्यास मदत केली.

तसेच साखळीतील वरचे हरवळे येथे वादळामुळे अनेक घरांवरील पत्रे उडाले असून घरांवर झाडे पडून नुकसान झाले आहे. अग्निशामक दलाने घटनास्थळी धाव घेत झाडे हटविण्यास सुरवात केली आहे. या पावसाने नक्की किती नुकसान झालंय याची आकडेवारी अद्याप समोर आलेली नसून पावसाच्या जोर काहीसा कमी होऊ लागला आहे.