गोव्यात सध्या पावसाच्या जोरदार सरी कोसळत आहेत. दोन्ही जिल्ह्यात पावसाने दमदार हजेरी लावली आहे. पावसाने झोडपून काढल्यानंतर काही भागात पडझड होण्यासह काही दुर्घटना समोर येत आहेत. मागील दोन दिवसांत झाडे उन्मळून पडणे, घरांची पडझड, वीज खांब कोसळणे, भूस्खलन आणि पाणी साचणे अशा घटना समोर येत आहेत.

दरम्यान, दुतळे-मडकई येथून एक मोठी घटना समोर आली असून, घरावर अचानक झाड कोसळल्याने संपूर्ण घरच जमीनदोस्त झाले आहे.

मिळालेल्या माहितीनुसार, दुतळे-मडकई येथील एका घरावर आंब्याचे झाड कोसळल्याने संपूर्ण घर जमीनदोस्त झाले. दरम्यान, घटना घडली त्यावेळी घरात असलेले पती पत्नी घराच्या बाहेर धावत आल्याने सुदैवाने त्यांचा जीव बचावला.

दुतळे-मडकई येथील सखाराम नाईक यांच्या घरावर झाड कोसळल्याची ही घटना घडली. यात सखाराम आणि त्यांची पत्नी किरकोळ जखमी झाले आहेत. दोघांनाही सध्या उपचारासाठी रूग्णालयात हलविण्यात आले आहे.

दरम्यान, अग्निशमन दलाचे जवान घटनास्थळी दाखल झाले असून, झाड हटविण्याचे काम सुरू आहे. घर पूर्णपणे जमीनदोस्त झाल्याने सखाराम यांचे मोठे नुकसान झाले आहे.

गुरूवारी (29 जून) हरमलमध्ये पावसाचा जोर वाढल्याने एक झाड विजेच्या तारांवर कोसळले. या घटनेमध्ये कोणत्याही प्रकारची जीवितहानी झाली नसली तर याचा भागातील वीजपुरवठ्यावर परिणाम झाल्याचे सांगण्यात येत आहे.