Alexio Sequeira Passport Issue: गोवा सरकारमध्ये नव्याने मंत्री झालेले आलेक्स सिक्वेरा यांच्या भारतीय पासपोर्टचा मुद्दा मिकी पाशेको यांनी पुन्हा उचलून धरला आहे. सिक्वेरांचा केनियात जन्म झाला व पोर्तुगालमध्ये जन्माची नोंद करण्यात आली आहे.

जन्म, पासपोर्ट नोंदीमुळे भारतीय नागरिकत्व गमावलेल्या इतर गोमंतकियांप्रमाणेच सिक्वेरांचा देखील भारतीय पासपोर्ट रद्द करावा, अशी मागणी माजी पर्यटन मंत्री मिकी पाशेको यांनी केली.

मंत्री आलेक्स सिक्वेरा यांचा 1957 साली केनियात जन्म झाला. 27 मार्च 2001 रोजी त्यांनी पोर्तुगालमध्ये जन्म झाल्याचे नोंदवले आहे. जन्म, पासपोर्ट नोंदीमुळे भारतीय नागरिकत्व गमावलेल्या इतर गोमंतकियांप्रमाणेच सिक्वेरांचा देखील भारतीय पासपोर्ट रद्द करावा, अशी मागणी पाशेको यांनी पत्रकार परिषदेत केलीय.

पासपोर्ट अधिकार्‍यांना मी पत्र लिहिले असून, सिक्वेरांचा पासपोर्ट रद्द केला नाही तर 15 दिवसांत पुढील निर्णय घेणार असा इशारा माजी पर्यटन मंत्री मिकी पाशेको यांनी दिला आहे.

दरम्यान, राज्यसभा खासदार सदानंद शेट तानावडे यांनी राज्यसभेत ‘पासपोर्ट रद्द’चा प्रश्र्न उपस्थित होता. याबाबत पाशेको यांनी त्यांचे अभिनंदन केले होते. पण मंत्री सिक्वेरा हे पोर्तुगीज नागरिक की भारतीय आहेत, हे स्पष्ट होत नाही, अशी शंका त्यांनी उपस्थित केली होती.

सिक्वेरा पोर्तुगीज नागरिक असल्याचा पुरावा माझ्याकडे आहे. ‘आसेंतो दो नासिमेंतो’च्या 644-ई-1 क्रमांकानुसार पोर्तुगीज नागरिक म्हणून त्यांनी नोंदणी केली आहे. जर त्यांनी नंतर हा दाखला रद्द करून भारतीय नागरिकत्व स्वीकारले असेल तर तो दाखला दाखवावा किंवा सरकारने तसे स्पष्ट करावे, असेही पाशेको यापूर्वी म्हणाले होते.