World Tribal Day भारतीय परंपरा, संस्कृती व वारसा याचे मूळ स्रोत आदिवासी समाजामध्ये असल्याचे प्रतिपादन राज्यपाल पी. एस. श्रीधरन पिल्लई यांनी केले. अनुसूचित जाती व जमाती आयोगाने मडगावात आयोजित केलेल्या जागतिक आदिवासी दिन कार्यक्रमाला ते प्रमुख पाहुणे म्हणून उपस्थित होते.

राज्यपालांनी सांगितले की, इतर देशांची संकल्पना ही मानव जातीच्या सभोवती गुरफटलेली आहे, पण भारताची संकल्पना ही पर्यावरणावर केंद्रित आहे. याचे कारण आदिवासी समाजाने आपले जीवन निसर्गाच्या सान्निध्यात व त्याचे जतन करण्यास समर्पित केले.

खास करून वनाचे रक्षण हे त्यांचे प्रमुख ध्येय आहे. आता हळूहळू इतर देश सुद्धा भारताप्रमाणे पर्यावरणीय संकल्पनेचा आधार घेऊ लागले आहेत, असे ते म्हणाले.

यावेळी सभापती रमेश तवडकर, आमदार गणेश गावकर, आंतोनियो वाझ, नागपूरचे प्रो. मधुकर विके, माजी आमदार वासुदेव मेंग गावकर, अखिल भारत आदिवासी कर्मचारी महासंघाच्या गोवा प्रमुख उपासो गावकर, अनुसूचित जाती व जमाती आयोगाचे सदस्य सचिव दीपक करमलकर, दशरथ रेडकर आदी मान्यवर उपस्थित होते.

या प्रसंगी राज्यपालांच्या हस्ते आदिवासी समाज रत्न पुरस्काराने सन्मानित करण्यात आले. त्यात पोलिस अधिक्षक गुरुदास गावडे, पोलिस अधिक्षक विश्राम बोरकर, कला व संस्कृती खात्याचे संचालक सगुण वेळीप, मेट्रोलोजी खात्याच्या संयुक्त संचालक रंजना बोरकर, जलस्रोत खात्याचे कार्यकारी अभियंता अंकुश गावकर, निवृत्त अधिकारी मधुकर कुंकळीकर, तसेच रामनाथ गावडे गावकर, गजानन रायकर, ज्योयसी डायस, पुष्पलता आर्लेकर रेडकर व भालचंद्र उजगावकर यांचा यात समावेश होता.

तसेच देशभरातील अनेक मान्यवरांनाही राष्ट्रीय समाज रत्न पुरस्काराने गौरविण्यात आले. या प्रसंगी प्रो. मधुकर विके यांनी अखिल भारत आदिवासी कर्मचारी महासंघाच्या कार्याची व कामाची माहिती दिली. मान्यवरांच्या हस्ते प्रकृती स्मरणिकेचे प्रकाशन करण्यात आले.