Goa Fire Case: घाडीवाडा-कारापूर येथे दत्तप्रसाद नार्वेकर यांच्या राहत्या घराला आग लागल्याची घटना घडली असून या आगीत लाखो रुपयांची हानी झाल्याच्या प्राथमिक अंदाज वर्तवण्यात येतोय.

या घटनेसंबंधी मिळालेल्या प्राथमिक माहितीनुसार रविवारी 14 जानेवारीला संध्याकाळी 5 च्या सुमारास नार्वेकर यांच्या घराला शॉर्ट सर्किटमुळे भीषण आग लागली.

ही आग एवढी भीषण होती की, नार्वेकर यांच्या घरातील भांडीकुंडी, फ्रिज, कपडे आदी संसार उपयोगी सर्व साहित्य जाळून खाक झाले. सुदैवाने यावेळी घरात कुणीच नसल्याने जीवित हानी टळली.

आगीचे वृत्त समजताच घाडीवाड्यातील सर्व स्थानिकांनी घटनास्थळी धाव घेत आग विझवण्यास सुरुवात केली.

मात्र आगीची तीव्रता जास्त असल्याने अग्निशामक दलाला पाचारण करण्यात आले. अग्निशामक दलाच्या जवानांनी घरात घुसून स्वयंपाक घरातील गॅस सिलिंडर घराबाहेर काढला त्यामुळे मोठा अनर्थ टळला.