Goa Court: कोल्हापूर येथील काही पर्यटकांना म्हापसा येथील स्वादिष्ट जेवण देणारे हॉटेल दाखविण्याच्या बहाण्याने पार्लरमध्ये नेऊन त्यांना लुटणाऱ्या टोळीमधील संशयित शिल्पा थापा हिला म्हापसा न्यायालयाने दुसऱ्यांदा जामीन नाकारला.

दरम्यान, या टोळीने केलेला गुन्हा गंभीर स्वरुपाचा आहे. तसेच त्यातील संशयित अजून फरारी आहेत. जामीन दिला तर संशयित गायब होण्याची शक्यता नाकारता येत नाही असे निरीक्षण करत न्यायालयाने हा निर्णय दिला.

म्हापसा येथे मसाज पार्लर असलेल्या संशयितांनी कोल्हापूरच्या पर्यटकांना हॉटेलऐवजी पार्लरमध्ये नेऊन त्यांना मारहाण केली होती. खंडणी वसूल करताना त्यांच्याकडील सोन्याचे दागिने, रोख रक्कम, मोबाईल मिळून सुमारे 1 लाख 80 हजारांचा ऐवज हिसकावून घेतला होता.

तसेच, या प्रकरणी तक्रार दिल्यास जीवे मारण्याची धमकी दिली होती. त्यामुळे हे पर्यटक गोव्यात पोलिसांत तक्रार न करता निघून गेले होते. कोल्‍हापूरला गेल्यावर झालेल्या घटनेची माहिती तेथील पोलिसांना दिल्यानंतर या प्रकरणाची गोवा पोलिसांकडून चौकशी सुरू झाली. म्हापसा पोलिसांनी गुन्हा दाखल करून सचिन भारद्वाज, मुबारक मुल्ला, आशिष सिंग व इतर तीन महिलांनी कटकारस्थान करून खंडणी वसूल केल्याप्रकरणी अटक केली होती.

त्यानंतर या गुन्ह्यात गुंतलेल्या जानकी कडगा, संगीता लामा व शिल्पा थापा या तिघांनाही अटक झाली होती. या प्रकरणाचा तपास सुरू असताना शिल्पा थापा हिने जामिनासाठी न्यायालयात अर्ज केला होता. त्यावेळी तो फेटाळण्यात आला होता.