Tirupati Balaji Temple Goa: ‘फुकटचे खाणे पोट फुगविणारे’ असे म्हणतात. याचा प्रत्यय नुकत्याच सरकार पुरस्कृत तिरुपती दर्शनासाठी गेलेल्या गोव्यातील भाविकांना आला. बालाजी मंदिरात पोहोचल्यावर तिथे दर्शनाची सोय करण्यासाठी कोणीच उपलब्ध नसल्याने वयोवृध्द भाविकांना अर्धी रात्र रांगेत उभे राहून काढावी लागली. त्यातच अचानक पाऊस सुरू झाल्याने रांगेतील भाविक चिंब भिजले. ती रात्र त्यांना अक्षरश: कुडकुडत काढावी लागली.

या यात्रेला गेलेल्या काही भाविकांनी दिलेल्या माहितीनुसार, गुरुवारी सायंकाळी सुमारे 400 भाविक खास गाडीने मडगावहून तिरुपतीला रवाना झाले. शुक्रवारी दुपारी 3 वाजता ते तिरुपती स्टेशनवर पोहोचल्यावर त्यांना हॉटेलवर नेण्यात आले. त्यांच्या बालाजी दर्शनाची सोय कशी केली आहे, याची माहिती स्थानिक आयोजकांनाही नव्हती.

त्यांना सायंकाळी 7 वाजता बालाजी मंदिरात नेण्यात आले. पण मंदिर परिसरात त्यांची सोय पाहण्यासाठी कोणीच नव्हते. त्यामुळे भाविकांची गोची झाली. त्यांना तिथे पोहोचल्यावर तुमची दर्शनाची सोय करण्यासाठी येथे कुणीही नाही. हवे तर तुम्ही पैसे भरून दर्शन घ्या, असे सांगण्यात आल्याने सर्व भाविक रांगेत उभे राहिले.

आमच्यासाठी ही यात्रा म्हणजे भयानक असा अनुभव होता, अशी प्रतिक्रिया या पथकातील एका 65 वर्षीय भाविकाने व्यक्त केली. आमच्या गटातील अर्धे लोक वेटिंग रूममध्ये आणि अर्धे बाहेर होते. आम्ही सगळेच भांबावून गेलो होतो.

त्या रात्री काहीजणांना रात्रीचे जेवणही मिळाले नाही, असे त्यांनी सांगितले. या साऱ्या गडबडीत बराच वेळ गेल्याने शेवटी या भाविकांना पद्मावती देवीचे दर्शन न घेताच गोव्यात यावे लागले. रात्री उशिरा ते सर्वजण गोव्यात पोहोचले.

अन्‌ वृद्ध भाविक भांबावले

पाऊस सुरू झाल्याने रांगेत उभे राहिलेले भाविक चिंब भिजले. अशातच दर्शनाची वेळ संपल्याने काहीजणांना दुसऱ्या दिवशी पहाटे दर्शन घ्यावे लागले. अर्ध्या भाविकांना बाहेरच ठेवल्याने त्यांना भिजलेल्या अवस्थेत रात्री उशिरा दर्शन न घेता हॉटेलवर परतावे लागले. जे वेटिंग रूममध्ये होते, तेही चिंब भिजले होते. त्यांनी ती रात्र कुडकुडत काढत दुसऱ्या दिवशी पहाटे दर्शन घेतले.