Goa Loksabha: लोकभा निवडणुका अवघ्या काही दिवसांवर येऊन ठेपली आहे. सध्या सर्वच राजकीय पक्ष उमेदवार निश्चिती करण्यात गुंतले असून उत्तर गोव्यासाठी भाजपकडून विद्यमान खासदार श्रीपाद नाईक यांच्यासह दयानंद सोपटे, दयानंद मांद्रेकर आणि दिलीप परुळेकर यांची नावे पाठवण्यात आली होती.

यापैकी श्रीपाद नाईक यांचे नाव जवळपास निश्चित झाले असून, यासंबंधीची अधिकृत घोषणा बाकी आहे.

तर, दक्षिण गोव्यासाठी माजी खासदार नरेंद्र सावईकर, माजी मुख्यमंत्री दिगंबर कामत, सभापती रमेश तवडकर, बाबू कवळेकर आणि दामू नाईक यांची नावे पाठविण्यात आली होती.

यापैकी कामत आणि तवडकरांनी माघार घेतल्याने इतर तिघांची नावे चर्चेत असल्याचे समजतेय.

काही दिवसांपासून दिल्ली दरबारी हजर असलेले गोव्याचे मुख्यमंत्री प्रमोद सावंत नुकतेच गोव्यात दाखल झाले असून दक्षिण गोव्याचा उमेदवार दुसऱ्या यादीत जाहीर होईल अशी माहिती त्यांनी दिली आहे.

एक उमेदवार निश्चित झाला आहे. दुसऱ्या उमेदवाराच्या नावावर अजून चर्चा सुरू असून लवकरच उमेदवाराच्या नावाची घोषणा दिल्लीतून होईल.

दुसऱ्या उमेदवाराचे नांव दुसऱ्या यादीत जाहीर होईल अशी प्रतिक्रिया मुख्यमंत्र्यांनी दिल्लीतून गोव्यात दाखल झाल्यानंतर दिली आहे.

मागील दोन दिवसांपासून उत्तर आणि दक्षिण गोव्यात लोकसभेसाठी भाजपचा उमेदवार कोण असणार? याबाबत दिल्लीत बैठका सुरु आहेत.