Goa Lok Sabha: लोकसभा निवडणुकीसाठी भाजप आणि काँग्रेसच्या उमेदवारांच्या ज्या याद्या जाहीर झाल्या, त्यात भाजपकडून दक्षिण गोव्याच्या नावावर अद्याप शिक्कामोर्तब झालेले नाही.

परंतु दक्षिण गोवा उमेदवारांमध्ये आघाडीवर असलेल्या पल्लवी धेंपे यांनी दिल्लीत जाऊन भाजप सदस्यत्व स्वीकारल्याने त्यांच्या नावाच्‍या घोषणेची केवळ औपचारिकता बाकी आहे.

त्यातच काँग्रेसचेही दोन्ही जागांवरील उमेदवार जाहीर न झाल्याने राजकीय पक्षांबरोबर या दोन्ही पक्षांच्या कार्यकर्त्यांचे डोळे दिल्लीकडे लागले आहेत.

भाजपची दक्षिण गोव्याची उमेदवारी कोणाला मिळणार, याबाबत उत्कंठा शिगेला पोहोचलेली असताना अखेर शनिवारी सायंकाळी घडलेल्या घडामोडीमुळे पल्लवी धेंपे यांचे नाव निश्‍चित झाले असून, ते जाहीर होण्याची वाट गोव्यातील भाजप समर्थकही पाहत आहेत.

दुसरीकडे, काँग्रेसचेही आत्तापर्यंत पहिल्या व दुसऱ्या टप्प्यातील उमेदवारांची नावे घोषित न झाल्याने काँग्रेसचे कार्यकर्ते आणि इच्छुक उमेदवारांचे समर्थक दिल्लीकडे डोळे ठेवून आहेत.

आपल्या उमेदवाराचे नाव जाहीर होताच कामाला लागावे लागणार आहे. सध्या दोन्ही पक्षांकडून रणनीती ठरविली जात आहे. बैठकांवर बैठका सुरू झाल्या आहेत.

काँग्रेसच्या नावाची घोषणा होत नाही, तोपर्यंत आम आदमी पक्षाला संयुक्तपणे प्रचारात सहभागी होता येत नाही.

श्रीपाद नाईक यांच्या भेटीगाठी सुरू:-

केंद्रीय निवडणूक आयोगाने निवडणूक कार्यक्रम जाहीर केल्याने गोव्यात तिसऱ्या टप्प्यात म्हणजे ७ मे रोजी मतदान होणार आहे. त्यामुळे काँग्रेस नाव घोषित करण्यात कोणतीच घाई करताना दिसत नाही.

भाजपने उत्तर गोव्यातून पुन्हा एकदा विद्यमान खासदार श्रीपाद नाईक यांना उमेदवारी दिली असून श्रीपाद नाईक यांनी भेटीगाठींना सुरुवात केली आहे.

दक्षिण गोव्यातून महिला उमेदवार म्हणून पल्लवी धेंपे यांचे नाव निश्‍चित होणार असल्याची भविष्यवाणी गोमन्तकने वर्तविली होती, ती आता सत्य होण्याच्या मार्गावर आहे. दिल्लीतून घोषणा होताच, राज्यातील भाजप नेत्यांची आणि दक्षिणेतील आमदारांची जबाबदारी वाढणार आहे.