पेडणे : नागझर, तुळसकरवाडी, दाडाचीवाडी येथील मोपा विमानतळ पीडित शेतकऱ्यांनी गोवा मुक्तिदिनाच्‍या रात्री तुळसकरवाडी येथे मुख्यमंत्री प्रमोद सावंत यांच्‍या प्रतिकात्‍मक पुतळ्याचे दहन करून भाजप सरकारविरुद्ध निषेध व्‍यक्त केला. यावेळी त्‍यांनी आपल्‍यावर झालेल्‍या अन्‍याय व्‍यक्त केला.

यावेळी बोलताना शेतकरी (Farmers) म्हणाले की, यापूर्वी तिळारी कालव्यासाठी, मोपा विमानतळासाठी, ॲरो सिटी व विमानतळासाठीच्या महामार्गासाठी पोलिस व सरकारी यंत्रणेचा उपयोग करून बळजबरीने आमच्या शेतजमीनी बळकावल्या. आमच्‍या राहत्या घरावर कुठलीही पूर्वकल्पना न देता बुलडोझर घालून पाडली व आम्‍हाला बेघर केले.

शेती, उस, काजू बागायती कष्‍टाने उभारून त्‍यावर आमच्‍या कुटुंबियांचे एकमेव उदरनिर्वाहाचे साधन हिरावून घेतले. ॲरो सिटीसाठी आमच्या काजू बागायतींना आग लावली, तर विमानतळ (Airport) महामार्गासाठी पंधरा-वीस पोलिसांच्‍या गाड्या आणून आमच्या महिला, मुले, वृद्धांवर पोलिस बळाचा वापर करून अमानुष लाठीमार केला. भाजप सरकारची (BJP government) ही अमानुष कृती पाहिल्यावर गोवा मुक्त (Goa Liberation) झालेला, हे आम्‍हाला अजिबात पटत नाही. उलट पोर्तुगीजांच्या चार पटीने आमच्‍यावर अत्याचार होत असल्‍याचे भूमिपुत्रांनी म्‍हटले आहे.