I-League 2 Football: बदली खेळाडू (सुपर सब) लक्ष्मणराव राणे याने सामन्यातील दहा मिनिटे बाकी असताना नोंदविलेल्या गोलच्या बळावर धेंपो स्पोर्टस क्लबने आय-लीग 2 फुटबॉल स्पर्धेत विजयाची नोंद केली. माजी आय-लीग विजेत्या संघाने स्पोर्टिंग क्लब बंगळूरवर 1-0 अशी निसटती मात केली.

सामना गुरुवारी एला-जुने गोवे येथील मैदानावर झाला. उत्तरार्धात ६९व्या मिनिटास बदली खेळाडू या नात्याने मैदानात आलेल्या लक्ष्मणराव याने ८०व्या मिनिटास केलेल्या गोलमुळे धेंपो क्लबला पहिल्या विजयाची नोंद करता आली.

त्यापूर्वी, ७४व्या मिनिटास सामन्यातील दुसऱ्या यलो कार्डमुळे शानिद वालन याला रेड कार्ड मिळाले होते व स्पोर्टिंग क्लब बंगळूरला बाकी कालावधीत दहा खेळाडूंसह खेळावे लागले.

धेंपो क्लबचे आता तीन लढतीतून चार गुण झाले आहेत. स्पोर्टिंग क्लब बंगळूरचा हा दुसरा पराभव असून त्यांचे तीन लढतीनंतर तीन गुण कायम राहिले आहेत.

धेंपो क्लबचा पुढील सामना ८ फेब्रुवारीला केंकरे एफसीविरुद्ध होईल.स्पर्धेतील अन्य एका लढतीत खारगर येथे ऑरेंज एफसीने सुदेवा दिल्ली एफसीला ३-० फरकाने नमविले.

प्रत्येकी तीन सामने खेळल्यानंतर ऑरेंज एफसीचे पहिल्या विजयासह चार गुण झाले असून पराभवामुळे सुदेवा दिल्लीचे चार गुण कायम राहिले.