केपे: कुंकळ्ळी औद्योगिक वसाहतीतील सनराईज झिंक या कंपनीच्या घातक कचऱ्याची कोणतीही आवश्यक ती सुरक्षा न घेता उघड्या डंपरमधून होणारी वाहतूक बुधवारी (ता.६) कुडचडे येथील स्थानिक युवकांनी रोखून धरली तसेच घातक कचरा वाहून नेणारे दोन डंपर कुडचडे पोलिसांच्या स्वाधीन केले.

गोवा कचरा व्यवस्थापन मंडळाने कुडचडेतील जनतेला ग्राह्य धरले असून कुडचडेतून कसलाही कचरा न्या व आणा, असे धोरण अवलंबले असून मंडळाची ही दादागिरी आम्ही खपवून घेणार नाही, असे दत्तराज गावस देसाई यांनी सांगितले. कुडचडे येथील कचरा प्रक्रिया प्रकल्पात फक्त सांगे, धारबांदोडा, केपे व काणकोण तालुक्यातील कचरा येणार असल्याचे सांगितले होते. मात्र, आता मडगाव, वास्को येथून कचरा आणला जातो, यावरही यावेळी युवकांनी लक्ष वेधले.

सुरक्षेबाबत चिंता!

कुंकळ्ळीहून कुडचडेमार्गे हा धोकादायक कचरा कोणतीही सुरक्षा न घेता विल्हेवाट लावण्यासाठी डंपरमधून पिसुर्ले येथे नेण्यात येत असल्याचे सांगितले जाते; पण अशा कचऱ्याची कुणाच्या आशीर्वादाने वाहतूक केली जाते, असा प्रश्न देसाई यांनी उपस्थित केला.